Vrasja pa mëshirë në ambientet e QKUK-së e 35-vjeçares Hamide Gashi nga ish-bashkëshorti i saj Sokol Halili, ka bashkuar në një protestë qindra qytetarë të Kosovës.
Tubimi me moton “Vrasja e grave nga burrat të trajtohet si urgjencë kombëtare” është duke u zhvilluar në sheshin “Zahir Pajaziti” në Prishtinë.
Në pankartat e protestuesve shkruhen mesazhe si: “Jeta e gruas e vlefshme pavarësisht a është nanë, motër, bijë!”, “Hapësirat private e publike të pasigurta për gratë!”, “Historinë e Kosovës po e shkruani me gjak të grave!”.
Protestuesit po kërkojnë përgjegjësi institucionale për vrasjen e djeshme, teksa , po marshojnë drejt Prokurorisë, Policisë së Kosovës dhe selisë së qeverisë.
“Polici jeni bashkëfajtorë në vrasjen e grave”, “Edhe sa thirrje të humbura”, “Deri kur me duru?” janë disa nga thirrjet e protestuesve në drejtim të forcave të rendit.
Protesta është thirrur nga Kolektivi për Mendim dhe Veprim Feminist dhe YIHR.
Protestueset para ndërtesës së Qeverisë ripërsëritin kërkesen për legalizimin e sprejitm ndërsa hodhën derivate të naftës për të ndezur zjarr para godinës së qeverisë.
Mbrëmjen e së mërkurës në oborrin e QKUK-së para Klinikës së Gjinekologjisë u vra një 35-vjeçare shtatzënë e cila ishte në prag të lindjes së një foshnje.
Kujtojmë se 35-vjeçarja u qëllua për vdekje mbrëmë nga ish-bashkëshorti i saj teksa ishte në prag të pritjes së një fëmije. Ish-bashkëshorti, vrasës tashmë është në kërkim nga Policia e Kosovës.
