Projekti i Portit të Durrësit vijon të mbrohet nga qeveria me këmbëngulje, ndërkohë që opozita e cilëson një aferë të ngjashme me atë të inceneratorëve.
Këtë të Mërkurë, në një studio televizive, ishte drejtori i Portit të Durrësit Pirro Vëngu, ai që mbrojti projektin.
Edhe pse 60 përqind e aksionerëve të investitorëve mbeten mister, Pirro Vëngu thotë se ka “zero kompani guacka”.
Qeveria deklaron se investitori strategjik është biznesmeni i njohur saudit, Mohamed El Alabar dhe kompanitë e tij të fuqishme të ndërtimit nga Dubai. Ndërsa, opozita dhe përfaqësues të shoqërisë civile e konsiderojnë Marinën e Jahteve një projekt mafioz, që do të përdoret për pastrim parash nga narko-trafikantët dhe biznesmenët – oligarkë shqiptarë.
Biznesmeni saudit, Mohamed Alabar, ka vendosur emrin e tij në kompaninë e regjistruar në Shqipëri, “Eagle Hill Real Estate”, e cila ka fituar të drejtën për të zhvilluar projektin 2 miliardë euro. Por, Alabari rezulton të jetë aksioner i vetëm 40 përqind të kompanisë mëmë, “North East Real Estate” me seli në Dubai, ndërkohë që nuk është përfshirë asnjë prej shoqërive të tij të mirënjohura ndërtuese, si edhe nuk dihet ende se kush zotëron 60 përqind të aksioneve.
