Një familjar i gruas shtatzënë që u vra sot nga ish-bashkëshorti ka thënë se Hamide Magashi do të sillte në jetë fëmijën ditën e nesërme.
I afërmi dëshmoi se Magashi ishte lajmëruar sot nga mjekët se ditën e nesërme do të realizohej procesi i lindjes.
Ai ka thënë se gruaja kishte qëndruar e martuar rreth 3-4 muaj me Sokol Halilin dhe se policia ishte në dijeni të situatës.
“Ka qenë e martume në Godanc, nja 3-4 muaj e martuar. Ka pasë mosmarrëveshje me burrë e me familje, diçka s’janë ra razi edhe mes policisë, mes socialit, u nda. Ka nejtë n’shpi të vetën deri tash kur i ka ardhë koha për lindje. Tash ka ardhë koha me lindë. Ka qenë e martuar, 3-4 muaj ka nejtë të burri. Policia krejt e ka ditë rastin, se nëpërmjet policisë u nda kjo çikë”, ka thënë ai.
Sipas tij, ditëve të fundit, ajo nuk kishte treguar nëse ka pasur kërcënime nga bashkëshorti i saj me të cilin ishin në proces divorci.
Motra e viktimës ka treguar jashtë kamerave se për gjashtë muaj, autori e ka mbajtur mbyllur viktimën. Kjo e fundit ishte në pritje të fëmijës së tyre të parë.
Mësohet se autoritet kanë qenë të njoftuar për rastin e abuzimit ndaj viktimës. Forca të shumta policie kanë shkuar në vendin e ngjarjes për zbardhjen e ngjarjes së rëndë.
