Drejtori i OSHEE-së në Lezhë, Edmi Përndreca është dhunuar këtë të Mërkurë. Sipas policisë, mbrëmjen e sotme, në aksin rrugor Shënkollë – Lezhë, një makinë që drejtohej nga drejtori i OSHEE-së, Edmir Përndreca është goditur nga pas nga një automjet tjetër.
Pas goditjes, personat në bordin e dy makinave janë përfshirë në një konflikt, ndërsa Përndreca është dhunuar.
“Në aksin rrugor Shënkollë – Lezhë, automjeti i OSHEE-së që drejtohej nga shtetasi E. P. 43 vjeç, banues në Lezhë, me detyrë drejtor i OSHEE Lezhë, është goditur nga mbrapa nga një automjet tjetër. Pas goditjes, drejtuesit e automjeteve janë përfshirë në konflikt si dhe dy pasagjerët e automjetit tjetër, të cilët e kanë dhunuar fizikisht shtetasin E. P.”, njofton policia.
Përndreca ka marrë dëmtime fizike dhe po mjerr ndihmë mjekësore, ndërsa nga policia raportohet se është jashtë rrezikut për jetën.
Megjithatë, mësohet se ai ka pësuar fraktura të shumta dhe është dërguar në spitalin e Traumës në Tiranë.
“Grupi hetimor në drejtimin e Prokurorisë së Rrethit Gjyqësor Lezhë, vazhdon veprimet hetimore për zbardhjen e plotë të rrethanave të ngjarjes, ndërsa vijojnë hetimet për identifikimin, kapjen dhe shoqërimin e autorëve për veprime të mëtejshme”, mbyllet njoftimi i bluve. Nuk përjashtohet që Përndreca të jetë dhunuar për shkak të detyrës.
