Nga Boldnews.al
Në kulmin e debateve politike, të cilat fare shpejt mund të shkojnë në dyert e drejtësisë, drejtuesi i Autoritetit Portual të Durrësit, Pirro Vengu, bën një tender 110 mijë euro për vendosjen e sinjalistikës horizontale dhe vertikale në atë port.
Një paradoks i madh, pasi vetë Vengu, bashkë me eproren e tij ministren Belinda Balluku, shkojnë dhe mbrojnë në Parlament dhënien e truallit të portit disa firma të regjistruara në vende offshore, por që ata i cilësojnë “janë Arabët”.
Por, z. Vengu, a nuk do t’i jepet ky port arabëve?!
Nëse ke para’, përse nuk i dorëzon në buxhetin e shtetit për investime të tjera?
Ose, bëj bamirësi, bëj ndonjë kopësht a çerdhe në Durrës, pasi gjithë ajo pasuri e shqiptarëve po u jepet “falas” firmave private, duke u hequr një mori taksash.
Dhe, në të gjithë këtë situatë, ku kanë dalë në dritë edhe emrat e parë se kush qendron pas kësaj afere, Vengu vijon i qetë të shpenzojë ç’t’i shohë syri para në arkë, pa e vrarë mendjen se në atë territor firmat do të vijnë shumë shpejt për të filluar ndërtime.
Sipas dokumenteve që disponon BoldNews.al, Porti i Durrësit ka shpallur fituesin e tenderit “zbatimi i projektit të sinjalistikës në Portin e Durrësit”, një projekt që do të zgjasë vetëm 90 ditë. Firma fituese është kompania “SI.SI-AL”, me një vlerë 11.159.290 lekë pa TVSH, ose me TVSH rreth 110 mijë euro.
Redaksia jonë shfletoi dokumentet e këtij tenderi, të cilat janë marrë “copy paste” nga dokumentet e mëparshme. Janë të njëjta specifikime, fillimisht japin të dhëna për gjirin e Portit të Durrësit, më pas për portin.
Por, ajo që bie më shumë në sy në këtë tender, është mos pasja e dijenisë nga drejtori Pirro Vengu se ai vend që administron do e marrin firmat private. “Porti Detar i Durrësit, është port kryesor i vendit dhe një nga më të mëdhenjtë në detet Adriatik dhe Jon.
Ka një ujëmbledhës detar me sipërfaqe 674 000 m2, pjesa tokësore ka një sipërfaqe të përgjithshme prej 1.467.000 m2, sipërfaqja e portit 793.000 m2”, thotë Vengu. Këto specifikime të lënë të kuptosh se sikur asgjë s’ka ndodhur.
Porti do vijojë të kontrollohet nga shteti, aty s’do bëhen ndërtime dhe firmat private as nuk egzistojnë.
Më tej, Vengu futet edhe në rol, teksa shpjegon se përse duhen sinjalistika hirozontale dhe vertikale. “Sigurimi dhe qarkullimi rrugor është ngushtësisht i lidhur me raportin që ka drejtuesi i mjetit me rrugën si rrjedhim dhe me informacionin që ai merr nga ambienti që e rrethon.
Sinjalet rrugore duhet të ofrojnë një lexueshmeri të mirë të gjurmës në të gjitha kushtet atmosferike dhe të shikueshmërisë. Në fund jep detaje dhe se ku do vendosen, te porti i peshkimit, te kapiteneria.
Madje edhe te terminali i kontenierëve, mallrave të përgjithshëm, terminali i trageteve apo edhe për Drejtorinë e Përgjithshme Detare. Në të gjithë Portin!
