Tre ditë pas vendimit të fundit për të ulur çmimin e karburanteve në vend, Bordi i Transparencës është mbledhur sot për të vendosur uljen e radhës së çmimeve.
Por ajo që bie në sy si çdo herë me vendimet e bordit “komunist” të Edi Ramës është ulja qesharake që bëhet, duke mos korresponduar aspak me situatën në bursën ndërkombëtare, aty ku nafta zbriti ditën e djeshme në 86 dollarë për fuçi.
Shqiptarët do të vazhdojnë kështu të blenë naftën më të shtrenjtë krahasuar me të gjithë vendet e rajonit, pasi çmimi i këtij produkti do të ulet vetëm me 3 lekë, ndërsa më tallës është vendimi për benzinën që do të kushtojë 1 lekë më pak.
Sa i përket çmimit të gazit, ai mbetet i pandryshuar dhe do të vijojë të shitet me 71 lekë/litri me pakicë.
Ndërkohë, në tregun e Londrës mesditën e djeshme çmimi i një fuçie ishte gati 2.9 dollarë më i ulët se në mbylljen e shkëmbimeve të një dite më parë dhe në fund, u pozicionua në 85.41 dollarë për fuçi.
Në tregun amerikan një fuçi u tregtua me 3,7% më pak, çka e çoi çmimin në 77.94 dollarë për fuçi.
Çmimetu goditën akoma edhe më shumë nga raportet se kufiri i çmimit të naftës ruse të planifikuar nga grupi G7 duhet të jetë më i lartë se çmimi aktual i saj i tregut. Grupi i shtatë vendeve më të zhvilluara të botës dëshiron të kufizojë çmimin e një fuçi nafte ruse të dorëzuar nga anijet në nivelin e 65-70 dollarë.
Vendim i Bordit të Transparencës:
Vendimet e Bordit të Transparencës në datë 25 Nëntor 2022 kanë ndryshime të çmimit nga ai i përcaktuar në mbledhjen e fundit.
Referuar të dhënave lidhur me bursën Platts të datës 24.11.2022, kemi ndryshime të çmimit nga ai përcaktuar në mbledhjen e fundit, konkretisht rezulton se çmimi (FOB/MED $ Ton) i Benzinës është 848, +8 nga data 21.11.2022, $/ Ton, ndërsa çmimi i Gazoilit/Diesel është 938, -7 nga data 21.11.2022, $/Ton. Kursi i këmbimit i BSH ka pësuar ulje në 112. 83 (-2.04 nga data 21.11.2022).
Si rrjedhojë çmimet e vendosura janë:
Çmimi i shitjes me pakicë i nënproduktit gasoil i standardit SSH EN 590 të jetë jo më shumë se 211 lekë/litri, ndërsa i shitjes me shumicë jo më shumë se 199 lekë/litër.
Çmimi i shitjes me pakicë i nënproduktit benzinë e standardit SSH EN të jetë jo më shumë se 194 lekë/litri, ndërsa i shitjes me shumicë jo më shumë se 182 lekë/litër.
Çmimi i shitjes me pakicë i nënproduktit gaz, të jetë 71 lekë/litri me pakicë dhe i shitjes me shumicë 59 lekë/litër për automjetet.
Çmimi i gazoilit për peshkim është vendosur 118 lekë/litër.
Çmimet e caktuara nga Bordi do të hynë në fuqi në datë 25 Nëntor, ora 18.00, dhe do të jenë të vlefshme deri në mbledhjen e ardhshme të bordit ku do të pasqyrohen ndryshimet e çmimeve të shitjes.
Bordi i transparencës që në krijimin e tij i është përmbajtur me përpikmëri në vendimet e tij lëvizjes së bursës Platts të Mesdheut për gazoilin, benzinën, si dhe faturave zyrtare të operatorëve.
Ministria e Financave dhe Ekonomisë ndjen detyrimin të sqarojë opinionin publik se jo çdo lëvizje e bursës së naftës bruto reflektohet në të njëjtën kohë dhe në të njëjtën masë në bursën e gazoilit dhe benzinës.
