Pas një seance maratonë, është votuar me 74 vota pro projektligji për marrveshjen e Portit të Durrësit.
Edhe pse gjatë fjalës së tij në Kuvend, Kryeministri Rama mbrojti projektin e Portit të Durrësit, në fund ka zgjedhur të mos jetë i pranishëm në votim.
“Në fund “Pilati” as nuk firmosi e as nuk votoi vetë për vjedhjen e shekullit! A thua do i mjaftojë për t’i shpëtuar qelisë? Prapë “shokët” do bëjnë burg për të?” ironizon Edi Paloka, teksa ka ndarë foton e karriges bosh nga vendi i Ramës.
Kujtojmë se ditën e djeshme, në një fjalim të gjatë në Parlament, Rama përdori një lumë akuzash dhe fyerjesh ndaj opozitës, duke i vënë asaj epitete nga më të ndryshmet. Kryeministri u mundua që të sqarohej se po fliste jo me fyerje, por me gjuhën e mësuesve të vetë, duke përmendur emra shkrimtarësh shqiptarë.
Janë 62 fraza fyese të kreut të qeverisë ndaj rivalëve të vetë politikë, gjatë 3 fjalimeve të tij në Kuvend, në intervale të ndryshme. Fyerjet kulmuan në fjalimin e tretë 53- minutësh të Ramës.
