Gjykata e Lartë në Greqi ka vendosur të rrëzojë kërkesën e Shqipërisë për të ekstraduar Lulzim Cakën, i njohur në botën e krimit si “i tmerrshmi” i Beratit.
Sipas BW vendimi është marrë më 26 shtator dhe i mbyll kështu përfundimisht derën një rikthimi të Lul Cakës në duart e drejtësisë shqiptare.
KUSH ËSHTË LULZIM CAKA?
Lulzim Caka njihet si një nga krerët e bandave kriminale që ka vepruar gjatë viteve 1995-2000 në zonën e Beratit, Fierit dhe Lushnjës, i akuzuar për disa vrasje dhe i dënuar me 25-vite burg.
Ai i është drejtuar për “prishje të vendimeve” Gjykatës Kushtetuese në dt. 19.12.2012,Gjykatës së Apelit në Vlorë në dt.28.04.2015 dhe Kolegjit Penal të Gjykatës së Lartë në vitin 2017.
Gjykata e Apelit Vlorë, në 19 Dhjetor të vitit 2012, e dënoi Cakën me 25 vjet heqje lirie për veprat penale të “vrasjes me dashje”, “vrasjes në rrethana cilësuese, mbetur në tentativë” dhe “mbajtjes pa leje të armëve luftarake”.
Ngjarja për të cilën u dënua Caka ka ndodhur në muajin Mars të vitit 1998, ku ai i ka bërë rezistencë forcave të policisë.
Caka,i sapo liruar nga burgu me një manipulim dokumentesh, i ishte kthyer aktivitetit të tij kriminal. Pas një informacioni për vendndodhjen e tij në fshatin Pobrat në Berat, u angazhua për kapjen e tij e gjithë Drejtoria e Policisë së Beratit. Forcat e policisë, të kryesuara nga Gani Malushi dhe Ilir Ngresi (që kanë humbur jetën nga atentate më pas), rrethuan Cakën së bashku me dy bashkëpunëtorë të tij, por të armatosur me kallashnikov, ata i bën për rreth gjysmë ore qëndresë policisë.
Caka u kap i plagosur, ndërsa bashkëpunëtori i tij, Xhevahir Çela mbeti i vrarë. Pas kësaj ngjarjeje, Lulzim Caka akuzoi shtetin që dha urdhër për eliminimin e tij, ndërsa nga hetimet rezultoi se Lulzim Caka i njohur ndryshe si “i forti” i Beratit kishte qëlluar edhe ndaj shokut të tij.
Lulzim Caka do të mbahet mend për sfidat e tij ndaj drejtësisë shqiptare. Ai u arrestua dhe më pas u lirua për mungesë provash disa herë. Caka i shpëtoi burgosjes së përjetshme falë mbrojtjes së kualifikuar, por edhe për faj të gjykatave që i hapën rrugën drejt lirisë me rishikim vendimi.
Lulzim Caka u soll në Shqipëri në vitin 2003, pas një marrëveshjeje ekstradimi me Italinë dhe pas 16 viteve burgim, u konsideruan të shlyera 25-vitet e dënimit.
Ndaj Lulzim Cakës rëndojnë një sërë ngjarjesh të frikshme, ku ngjarja më e tmerrshme është ajo e nënës së tij, Xhevrie Caka. Pasi ajo kishte shkuar për të takuar të birin që ndodhej i arrestuar në Fier u rrëmbye në derën e Komisariatit të Policisë në vitin 1999 dhe u gjet e masakruar në pyllin e Semanit.
Atëherë Caka u betua për hakmarrje. Ai u arratis nga burgu dhe në mes të fshatit Samaticë vrau dy nga autorët e vrasjes së nënës së tij Valter Begën dhe Mariglen Camin, piramidën e krimit në fillim të viteve ’90 në Berat.
Në vitin 1995 ai u përfol për vrasjen e arkëtarit të Kutallisë, ndërsa më pas Caka frikësoi këdo që udhëtonte në aksin nacional Berat-Fier, pasi shpesh postblloqet e tij me njerëz të armatosur sulmonin automjetet.
