Nga Boldnews.al
Një nga pasuritë më të mëdha të krimit të organizuar, të sekuestruara në Shqipëri, ka qenë hoteli “Ador” në Rinas. Një ambient luksoz, afër aereoportit, i cili i kaloi shtetit në dhjetor të vitit 2021.
Sipas SPAK, prona i përkiste Admir Hoxhës, i cili është dënuar me 12 vite burg. Ai bënte pjesë një grup kriminal që kishin ngritur një laborator droge në Has.
Aktualisht Hoxha është i lirë, i shpallur në kërkim ndërkombëtar. Ndërkohë, pasuria e tij më e madhe (e sekuestruar) ka dalë në ankand.
Por, shikoni se me çfarë çmimi?!
Në njoftimin e fundvitit të kaluar, SPAK shkruan se pasuria ka një vlerë 5 milionë euro. Ndërkohë, Drejtoria e Përgjithshme e Pronës Publike e nxjerr në ankand me një vlerë 800 mijë euro!
Sipas dokumenteve që disponon BoldNews.al, Drejtoria e Përgjithshme e Pronës Publike, një institucion në varësi të Ministrisë së Financave dhe Ekonomisë, ka hapur një ankand në bazë të një VKM-je. Sipas tyre, në këtë vendim përcaktohen kriteret, mënyrat dhe procedurat e dhënies në përdorim dhe të tjetërsimit të pasurive të konfiskuara, e cila shpallet për shitje me një çmim fillestar.
Më tej, në këtë vendim, thuhet se pasuria është në administrim të Agjencisë së Administrimit të Pasurive të Sekuestruara dhe të Konfiskuara, por që prej ditës që u sekuestrua, pasurisë i është vënë shiriti dhe s’është menaxhuar.
Në dokument shkruhet gjithashtu se pasuria e cila nxirret në ankand është “Bar-Restorant hotel ‘Ador'”, me numër pasurie 32/24”. Ka një truall 3320 metra katrorë dhe sipërfaqe ndërtimi 638 metra katrorë. Por, shikoni pak çmimin e ankandit; 82.000.000 lekë. Ose, rreth 800 mijë euro! Një shumë gjashtëfish më e vogël nga vlera reale e kësaj pasurie.
Në dokumentet shoqëruese, ministria thotë se personat apo firmat e interesuara duhet të bëjnë kërkesë me shkrim për blerjen e objektit, mandat pagesën apo garancinë bankare në origjinal që vërteton derdhjen apo ngurtësimin e 20 % të vlerës së fillimit të ankandit, në lekë. Gjithashtu edhe “deklarimin personal të secilit pjesëmarrës, që vërteton se ky i fundit nuk është në konflikt interesi”.
Pra, me Admir Hoxhën, i cili vijon të jetë i lirë.
Ka dyshime se pas këtij çmimi “fshihen” njerëzit e pronarit të parë dhe se pasuria do të vijojë të menaxhohet sërish nga familja Hoxha. Madje, për këtë arsye, që nga vitit 2018 e deri në ditët e sotme, bari, restoranti dhe hoteli nuk është menaxhuar, pas “frikës” së Agjencisë së Administrimit të Pasurive të Sekuestruara dhe të Konfiskuara për ta menaxhuar.
Më sipër, faktuam se Drejtoria e Pronave e ka nxjerrë në ankand këtë pasuri me një vlerë 800 mijë euro. Por, sa e ka vlerësuar vetë SPAK kur e sekuestroi dhe konfiksoi?!
Në dhjetor të vitit të kaluar, sipas njoftimit më sipër, SPAK shkruante në rrjete sociale se hoteli “Ador” në pronësi të Admir Hoxhës, i ka kaluar shtetit.
“Kjo pronë e konfiskuar me vlerë 5 (Pesë) Milion Euro i kalon shtetit shqiptar! Hoteli i përkiste një grupi kriminal të strukturuar që merrej me trafik ndërkombëtar droge”, thuhet në njoftimin e SPAK. Pra, me një vlerë 5 milionë euro. Apo, 6 herë me shumë sesa vlera e nxjerrjes në ankand.
Vlera e këtij ankandi veçse i vë vulën paaftësisë së organeve të drejtësisë, apo edhe të qeverisë, për luftë “pa kompromis” me krimin e organizuar. Nëse do ta luftosh, duhet t’i marrësh pasurinë. Por, edhe në këtë moment që ia merr, sërish e fal atë te pronari i parë!
