Një operacion i DEA-s amerikane në bashkëpunim me SPAK-un dhe policinë malazeze arrestoi sot 15 persona, mes tyre ish-kryetarin e komunës Frakull, Viktor Çervanakun. Ky i fundit raportohet të jetë në një rol drejtues në Bashkinë e Tiranës.
Bëhet fjalë për një ngarkesë rreth 400 kilogramë pleh kimik të përzier me kokainë, që ka ardhur nga Mali i Zi në Shqipëri. Dyshohet se droga që u gjet në një banesë në fshatin Frakull e Madhe të Fierit, ka ardhur në portin e Tivarit të Malit të Zi nga Kolumbia.
Katër shqiptarë u arrestuan në Tiranë për këtë sasi kokaine. Mes të arrestuarve është edhe Klajdi Vrioni (Kodra), 32 vjeç. Raportohet se në pranga janë vënë dhe dy kolumbianë, si personat të cilët bënin përpunimin e kokainës.
Për ngjarjen reagoi edhe kryeplaku i fshatit Frakull i Madh.
“Unë jam kryeplaku. Më thirrëm më thanë të jesh i pranishëm në kontrollin që i bënë tek shtëpia. Nuk i gjetën asgjë, i gjetën vetëm disa fishekë aq pash unë. Thasët kanë pleh organik. Në brendësi nuk kishte gjë tjetër. Mund të ishin 200 thasë, ishin jashtë jo në magazinë. Armë nuk pashë, vetëm fishekë. 50 policë ishin të pranishëm në kontroll, civilë ka shumë por nuk mund ti identifikoj, të huaj nuk pashë. Policët kanë ardhur nga Tirana”, tha fillimisht Muaçaj për gazetarët.
Banesa që ishte kthyer në laborator droge është në pronësi të Viktor Çervanaku, i cili siç tha dhe kryeplaku për mediat, është ish-kryetar i komunës Frakull, por edhe drejtor në Bashkinë e Tiranës.
“Çervanakun nuk e njoh për të tillë, ka qenë kryetar komune. Është drejtor në bashkinë e Tiranës. Nuk është magazinë, e ka shtëpi,” deklaroi Fiqeret Muçaj.
Ndërkohë, në laboratorin që u zbulua në fshatin Fratar të Fierit janë kapur edhe 2 kallashnikov, një shotgun dhe një çifte.
