Ashtu siç kishte paralajmëruar për një “betejë” të ashpër në Parlament në lidhje me projektin për portin e Durrësit, kreu i Partisë Demokratike Sali Berisha e mori vetë i pari fjalën në nisje të seancës së sotme plenare.
Duke e cilësuar projektin një mega-aferë që i rrëmben shqiptarëve 200 mijë metër katrorë tokë për t’ia dhuruar privatit, Berisha tha se qeveria kërkon të asgjesojë portin dhe aktivitetin tregtar prej 8 mln ton mall që kryhet në Durrës.
“Të dashur qytetarë që ndiqni këtë seancë, deputetë dhe deputete, zonja kryetare, sot këtu diskutohet për plaçkitjen më të madhe në historinë kombëtare të një prone publike, nga një grup i kryesuar nga Edi Rama, i cili kërkon të shndërrojë në pronë dhe pasuri personale, pronën publike më të çmuar që kanë sot shqiptarët, portin e Durrësit. Me këtë megaaferë kërkohet t’u shkurtohet fjala deputetëve. Një arab kërkon të zbatojë planin. Se ça ka Alabari dhe Rama pjesë në këtë plan, s’do e marrim vesh. Ky klan ju përvetëson shqiptarëve 200 mijë metër katrorë tokë në pjesën më të kushtueshme të Durrësit. Ju zhduk shqiptarëve portin mijëravjeçar. Ka qenë portë hyrëse mes Ballkanit dhe BE. Ka qenë nyja kryesore e lidhjes me Kostandinopojën. Porti që merr rrugën Egnatia, lidhje me Kostandinopojën. Sot ky port asgjësohet me gjithë qindra, qindra mln euro investime në këtë port. Kapaciteti i tij është 8 mln ton mall në përpunim. Pozicioni i tij në shekuj dhe mijëvjeçar është përcaktuar si më i përshtatshmi”, tha Berisha.
Berisha iu bëri thirrje deputetëve të Kuvendit të Shqipërisë që të heqin dorë nga marrëveshja për portin e Durrësit, ndërsa zbuloi se me taksat e shqiptarëve do të investohen 2 miliardë euro për portin e ri tregtar në Porto Romano.
Ai gjithashtu denoncoi kompanitë e Call Centera-ve që veprojnë në Tiranë, duke thënë se kontrollohen nga Olsi Rama dhe deri më tani kanë grabitur nga europianët nëpërmjet investimeve të paligjshme në portofolet online të Bitcoin, plot 2.2 miliardë euro.
“Është kuleta më e madhe e Bitcoin në Europë. E dini se me sa urgjencë erdhi këtu ligji i Bitcoin. Deri tani janë vjedhur nga Shqipëria 2,2 mld euro evropianeve. Apartamente dhe 900 njësi akomodimi hoteliere, do mblidhen këtu mamuthët e Shqipërisë dhe të Lindjes së Mesme, do kenë dhe jahtet përkarshi, kurse shqiptarët popull gomonesh dhe do largohen në Europë. E dini se sa kushton porti i ri ekuivalent me portin e Durrësit, kushton 2 miliardë euro. Ato do dalin nga shqiptarët e varfër. Thërritini arsyes dhe hidheni poshtë këtë marrëveshje, nëse keni dinjitet”, deklaro ai.
Berisha paralajmëroi kryeministrin Edi Rama se do të përfundojë në burg nëse kalon marrëveshjen për portin e Durrësit.
“Edi Rama i bindur të jesh se te porti i Marinës do përfundosh vetë dhe s’do dalësh më kurrë prej tij. S’ka burg që të mban ty me këtë që po bën. Ti zonjë që ke qejf t’i ndash deputetët në kategorisë së parë dhe të dytë, kjo është histori turpi dhe vetëm turpi. Unë e kuptoj shumë mirë ndarjen e grupeve dhe është normale, por nëse krerëve të grupeve u jepet një kohë e caktuar, koha duhet e barabartë për çdo deputet. Ti je e vetmja që ndan parlamentin në këtë mënyrë. Kjo do marrë fund. Ky parlament nuk do funksionojë asnjë ditë kështu siç e keni caktuar ju”, nënvizoi kreu i PD.
