Ndryshe nga çfarë kishte vendosur GJKKO, Apeli i këtij organi të drejtësisë ka pranuar sot kërkesën e Prokurorisë së Posaçme për të caktuar një masë të dytë “arresti me burg” për ish-deputetin socialist Alqi Bllako.
Afera e inceneratorëve fundos kështu Bllakon, për të cilin u kërkua masë e dytë sigurie nga SPAK pas fakteve të reja për raportin e tij me Klodian Zoton dhe komunikimet e vazhdueshme, që dolën në dritë nga hetimet për inceneratorin e Elbasanit.
SPAK iu drejtua fillimisht Shkallës së Parë të GJKKO me kërkesë për një masë siguri ndaj Bllakos 2 javë më parë, por u refuzua.
Hetimet e SPAK për inceneratorin e Elbasanit kanë rënduar pozitat e ish-deputetit socialist, ku përveç akuzës për “shpërdorim detyre të kryer në bashkëpunim”, prokuroria e Posaçme ka ngritur ndaj tij edhe akuzën e “korrupsionit”.
Pas sekuestrimit të kompjuterit të Bllakos dhe marrjes së tij si i pandehur u gjetën prova që e implikojnë atë në korrupsion të zyrtarëve të lartë, çka çoi edhe në lëshimin e 11 urdhër-arresteve të tjera.
Sipas dosjes hetimore Bllako ka shkëmbyer e-maile nga adresa private me administratorin e kompanisë “Alb tek energy”, Klodian Zoto.
Përmes Mirel Mërtirit, ai e informonte Zoton mbi procedurën e dhënies me koncension të inceneratorit të Elbasanit, duke i përcjellë e-mail e zyrtarëve të ministrisë së Mjedisit mbi procedurat që duhet të ndiqte për të fituar të drejtën e ndërtimit të djegësit.
Shkëmbimi i e-maileve është realizuar në kohën kur Bllako ushtronte detyrën e sekretarit të përgjithshëm në Ministrinë e Mjedisit dhe prokuroria ka dyshime se ish-deputeti të ketë paracaktuar garën duke shpallur fituese kompaninë që përfaqësohej nga Zoto.
