Në seancën plenare që ka nisur prej orës 10:00 janë nxehur gjakrat dhe debati është tensionuar, me kryetarin e Partisë Demokratike, Sali Berisha dhe deputetët e tij që kanë “pushtuar” foltoren dhe kanë nisur transmetimin e fjalës së tyre në Facebook, pasi kryetarja e Kuvendit e ndaloi të merrte fjalën për replikë ndaj kreut të Grupit të PS, Taulant Balla.
Ishte fjala e Ballës që ndezi përplasjet pasi akuzave të forta të Berishës për mega-aferën e portit të Durrësit iu përgjigj duke e cilësuar kreun e PD si “përfaqësues të Vladimir Putinit në Shqipëri” dhe e akuzoi se “ka filluar të takohet me partnerë birucash“.
Berisha nëpërmjet lidhjes live në Facebook dhe i rrethuar nga Garda u kundërpërgjigj duke akuzuar Taulant Ballën për porositjen e vrasjes së avokatit të Ardjan Çapjas, Ravik Gurra.
“Ai nuk ka vend në Parlament shko jepi përgjigjen dëshmive për vrasje. Shpirti i avokatit Ravik Gura kërkon drejtësi dhe ti je i akuzuar se ke porositur vrasjen e tij. Ne jemi të zotuar të vendosur të mbrojmë të drejtat tona nuk mundet një i akuzuar për vrasje, nuk mundet një njeri që akuzohet se ka porositur vrasje në Elbasan të marrë fjalën këtu nxirre jashtë Parlamentit të shkojë në Prokurori. Si të duket ty akuza se ka porositur vrasjen e Ravik Gurrës? Ose të drejtat e opozitës do respektohen ose opozita…. Mbylle gojën se po flas unë, shko në Prokurori se je i akuzuar për vrasje. Ke porositur vrasjen e Ravik Gurrës, mos përdor imunitetin diplomatik. Hera e dytë që akuzohet për porosi vrasje”, tha Berisha.
Në akuzën e fortë që bëri kreu i PD ju referua dëshmisë së dhënë nga Çapja së fundmi në gjyqin që po zhvillohet kundër tij për vrasjen e Gentian dhe Nezir Beqirit.
Çapja akuzoi një “politikan me emrin Taulant” që ka dalë në përgjimet e masakrës së shkurtit të vitit 2016 dhe gjatë hetimeve përgjimet u fshinë me urdhër të gjykatës.
“Pas masakrës së 3 shkurtit 2016 unë nuk kam dalë më nga shtëpia. Me avokatin e ndjerë Ravik Gurraj kemi marrë dosjen e ngjarjes së vitit 2016 dhe aty ka qenë në përgjim edhe një zyrtar i lartë me emrin Taulant. Më pas kemi mësuar se me vendim të Gjykatës së Elbasanit përgjimet e politikanit janë asgjësuar. Politikani me emrin Taulant më ka marrë në telefon dhe më ka ofruar ndihmë, por unë nuk i kam kërkuar asgjë. Emrin e tij të plotë nuk e përmend sepse më rrezikohet familja”, deklaroi Çapja.
DEBATI:
Sali Berisha: Je akuzuar për vrasje, shko përballu me akuzat, je i akuzuar për vrasje, është hera e dytë që akuzohesh për porosi vrasjesh. Mos përdor imunitetin, shko dhe jep llogari. Nuk e lan dot me asgjë porosinë për vrasjen e Ravik Gurrës.
Taulant Balla: Kërkoj masë përjashtimi, kërkoj masë.
Sali Berisha: Shko në Prokurori, je i akuzuar për vrasje!
Albana Vokshi: Jepi fjalën, ose nuk ikim.
Edmond Spaho: Ose jepi fjalën ose na përjashtona të gjithëve,. parlament pa opozitë nuk ka.
Sali Berisha: Unë përfaqësoj këtu shqiptarët, nëse ju nuk respektoni të drejtat tona, ne do të fitojmë betejën tonë. Mos ikni nga salla, këta kërkojnë të vënë censurën, ky është akt vjedhjeje. Nuk dua ti jap përgjigje atij që është i akuzuar për vrasje. ça thotë ai mo ça thotë, avokati i Taulantit, o kone.
