Klisman Nikolli, oficer i patrullës së përgjithshme në Policinë e Shëngjinit është arrestuar nga karabinierët në Itali, si pjesë e një grupi prej tre personash të akuzuar për 18 vjedhje dhe tentativa në Venetto dhe Friuli nga data 30 tetor deri më 15 nëntor.
Më 17 nëntor, Nikolli u ndalua nga karabinierët e Portogruaro kur tentoi të kthehej në Shqipëri, raportojnë mediat italiane. Në dhomën e hotelit në San Stino di Livenza, ku ndodhej me bashkë të hetuarit Viktor Bilani, 30 vjeç dhe Flor Koca, 35 vjeç, valixhet e tyre tashmë ishin gati, por në vend se ti merrte dhe ti dërgonte në aeroport një grua vendase siç e kishin parashikuar, ata u përballën me karabinierët.
Pas një vjedhjeje të kryer në San Michele është përgjuar një “BMW” e dyshimtë. Pasi u identifikua targa, karabinierët zbuluan se mjeti kishte si destinacion një “Bed & Breakfast”, ku Nikolli, Bilani dhe Koca ishin regjistruar rregullisht. Nga San Stino, “BMW”-ja lëvizte çdo ditë dhe ndalonte pikërisht aty.
Nikolli raportohet se ishte me shërbim në Policinë e Lezhës, ndërsa kishte marrë leje prej disa kohësh.
