Bordi i Transparencës është mbledhur ditën e sotme për të vendosur që të ulë çmimin e karburantit në vend.
Çmimi i naftës që deri më sot ishte 218 lekë/litri do të bëhet 214 lekë/litri duke shënuar një ulje me 4 lekë.
Sa i përket benzinës që shitej me 200 lekë/litri prej 18 Nëntorit, çmimi i ri do të jetë 195 lekë/litri, duke shënuar një ulje me 5 lekë.
Ndërkohë mbetet i pandryshuar çmimi i gazit që do të vijojë të shitet me 71 lekë/litri me pakicë.
Pavarësisht se trendi i vendimeve të fundit të institucionit “komunist” të qeverisë ka qenë zbritës, uljet që Bordi i Ramës bën vijojnë të mbeten qesharake.
Ndryshimet nga njoftimet paraardhëse janë me 4 deri në 5 lekë për litër, në një kohë që çmimi i naftës në bursën ndërkombëtare ka prekur ditën e djeshme nivelin e para nisjes së luftës në Ukrainë, duke u shitur me 80 dollarë për fuçi.
Vendim i Bordit të Transparencës 22.11.2022
Vendimet e Bordit të Transparencës në datë 22 Nëntor 2022 kanë ndryshime të çmimit nga ai i përcaktuar në mbledhjen e fundit.
Referuar të dhënave lidhur me bursën Platts të datës 21.11.2022, kemi ndryshime të çmimit nga ai përcaktuar në mbledhjen e fundit, konkretisht rezulton se çmimi (FOB/MED $ Ton) i Benzinës është 840, – 68 nga data 17.11.2022, $/ Ton, ndërsa çmimi i Gazoilit/Diesel është 945, -42 nga data 17.11.2022, $/Ton. Kursi i këmbimit i BSH ka pësuar rritje në 114. 87 (+ 1.48 nga data 17.11.2022).
Si rrjedhojë çmimet e vendosura janë :
Çmimi i shitjes me pakicë i nënproduktit gasoil i standardit SSH EN 590 të jetë jo më shumë se 214 lekë/litri, ndërsa i shitjes me shumicë jo më shumë se 202 lekë/litër.
Çmimi i shitjes me pakicë i nënproduktit benzinë e standardit SSH EN të jetë jo më shumë se 195 lekë/litri, ndërsa i shitjes me shumicë jo më shumë se 183 lekë/litër.
Çmimi i shitjes me pakicë i nënproduktit gaz, të jetë 71 lekë/litri me pakicë dhe i shitjes me shumicë 59 lekë/litër për automjetet.
Çmimi i gazoilit për peshkim është vendosur 120 lekë/litër.
Çmimet e caktuara nga Bordi do të hynë në fuqi në datë 22 Nëntor, ora 18.00, dhe do të jenë të vlefshme deri në mbledhjen e ardhshme të bordit ku do të pasqyrohen ndryshimet e çmimeve të shitjes.
Bordi i transparencës që në krijimin e tij i është përmbajtur me përpikmëri në vendimet e tij lëvizjes së bursës Platts të Mesdheut për gazoilin, benzinën, si dhe faturave zyrtare të operatorëve.
Ministria e Financave dhe Ekonomisë ndjen detyrimin të sqarojë opinionin publik se jo çdo lëvizje e bursës së naftës bruto reflektohet në të njëjtën kohë dhe në të njëjtën masë në bursën e gazoilit dhe benzinës.
