“Gabimi i djalit ishte që dashuroi. Që të dashurosh nuk është gabim. Gabim tjetër s’ka bërë djali”.
Kjo ishte fjalia me të cilën Tajar Osmani, daja i Flonino Mërkuri, të cilit iu mor jeta nga goditjet me thikë të Viron Karabollajt në Spinea të Italisë, tha për mediat, teksa në familjen e 23-vjeçarit në fshatin Grykë të Fierit janë hapur dyert e mortit.
I riu nga Fieri prej më shumë se një viti bashkëjetonte me Mynerve Karabollaj (Vera Myrtaj) në banesën e saj në rrugën “Leopardi” të rajonit të Venecias, por ish-bashkëshorti i 37-vjeçares i vru të dytë mbrëmjen e së dielës, për t’u vetë varur më pas në ambientet e kompanisë ku punonte.
Daja i 23-vjeçarit me lot në sy ka folur për mediat, duke thënë se vrasja e nipit të tij ishte e pabesë dhe se më parë ndërmjet nipit të tij dhe ish-bashkëshortit të 37-vjeçares nuk ka patur asnjë konflikt.
“Ngjarjen e morëm vesh natën. Mori mbesa në telefon. Ai që bëri krimin i mori përsipër vrau dhe veten. Portalet shkruajnë duke ngrënë fara luledielli pa mësuar si është e vërteta. Nuk ishte krim i paralajmëruar pasi nuk ka pasur as gërvishtjen më të vogël me ish-burrin. Hera e parë vajti bëri krimin. Po të kishte patur konflikt më parë do kishim marrë djalin”, tha daja i 23-vjeçarit.
Për më tepër ai ka thënë se lidhja e Verës dhe Floninos ishte e pranuar nga familjarët e të dyja palëve dhe kishte nisur 3 vite më parë.
“Gruaja ishte e divorcuar këtu e 10 vite më parë. E kishte braktisur vetë ish bashkëshorti. Personi që bëri vrasjen ishte ish-burri i saj. Djali kishte tre vjet me të. Ka ardhur këtu në shtëpi gruaja. Ka vajtur nipi dhe tek vëllezërit e saj në Vlorë. Djali ka një vit e ca në Itali, por me vajzën kanë tre vite që njihen. Ishte marrëdhënie me njohje familjare, jo problematike. Tani presim të na vij trupi”, shtoi ai.
Ndërkohë daja i viktimës apelon që ngjarja të mos përflitet dhe kërkon që trupi i nipit të tij të kthehet sa më parë.
