Ndërron jete ne spital 89-vjecari Çaush Shehaj, i cili ra pre e grabitjes me arme ne banesën e tij në fshatin Klos të Mallakastërës.
Raportohet se i moshuari nuk u ka mbijetuar dot plagëve si pasojë e goditjeve të forta nga ana e 2 grabitësve që ju futën në shtëpi dhe e dhunuan, kërcënuan me armë e i vodhën një shumë parash.
Lidhur me ngjarjen për Ora News kanë folur Asqeri Çela dhe Astrit Çela, nipërit e 89 vjeçarin. Ata kanë treguar se i afërmi i tyre është dhunuar në mënyrë barbare nga grabitësit. Në të gjithë trupin ka pasur hematoma. Ata thonë se i moshuari jetonte i vetëm në banesë me bashkëshorten e tij të semurë nga skleroza. Ndërkohe që 4 fëmije të martuar të 89 vjeçarit ndodhen në emigrim.
Sipas tyre ky është rast i përsëritur, pasi ka ndodhur edhe një herë tjetër kur i kanë vjedhur çiften por s’kanë gjetur para. Të afërm të të moshuarit kanë kërkuar të vihet në vend drejtësia dhe të marrin dënimin e merituar për autorët e kësaj vrasje të rëndë.
“Krim makabër. Është rasti i dytë dhe është i njëjti person që ka bërë të njëjtën gjë. Ka shkuar policia një herë, mori shenjat e gishtave ai eksperti. Nuk u bë gjë herën e parë. Shkuan tani, e vranë. Humbi jetën sot. Gruan e ka të sëmurë, fëmijët i ka Greqi. ka dy djem dhe dy vajza. Ne duam drejtësi, shteti të vërë dorë”, tha ai.
Vetë bashkëshortja e viktimës tha se janë goditur të dy nga dy të rinjtë.
“Nuk ishte sëmurë por iku. Më kanë goditur, të dyve”, tha bashkëshortja. Ndërsa të afërm të çiftit thanë se e kanë gjetur të moshuarin në mes të shtëpisë, të gjakosur.
“Neve pamë që ishte goditur, dhe ishte në gjak. Ishte në mes të shtëpisë. Ambulanca erdhi menjëherë. Ja dera tek është, shiko, e kanë shqyer. Edhe herën e parë kështu e bën. Këta i kanë rënë në këmbë se këtu gjetëm baltë. Të shikosh jastëkun e motrës sime. Nuk tha asnjë fjalë ai“, tha kunata e 89-vjeçarit.
“Vajta të merrja qumësht e takova gruan e më tha Caushin e kanë bërë gjak. E gjet shtrirë tërë gjak. Erdhi hajduti me automatik. Ishte i gjakosur në tapet. Ka gjurmë akoma“, tha një tjetër e afërme e familjes Shehaj.
- Ngjarja
Grabitja ka ndodhur në orët e para të mëngjesit të djeshëm në fshatin Klos të Mallakastrës.
Autorët e dyshuar të ngjarjes, Ervis Halimi, 22 vjeç dhe Musa Gudo, 28 vjeç janë arrestuar nga policia. Ata kanë arritur të marrin 5 mijë lekë nën kërcënimin e armës.
I moshuari u dërgua në spital, por nuk mundi t’i mbijetonte plagëve të marra. Në gjendje të lirë është proceduar një i mitur, 16-vjeçari F.Ç për veprën penale “Moskallëzimi i krimit”.
Ndërsa në cilësinë e provës materiale u sekuestrua arma e zjarri tip automatik me një krehër me fishekë që dyshohet se janë përdorur gjatë grabitjes.
Çfarë njoftoi policia?
Autorët e dyshuar të ngjarjes, Ervis Halimi, 22 vjeç dhe Musa Gudo, 28 vjeç janë arrestuar nga policia.
“Bazuar në provat e grumbulluara, shërbimet e Komisariatit të Policisë Mallakastër, në ndërveprim me të gjitha strukturat e DVP Fier dhe në bashkëpunim të ngushtë me Prokurorinë pranë Gjykatës së Rrethit Gjyqësor Fier, organizuan dhe finalizuan operacionin policor të koduar “Klosi”, në kuadër të të cilit u bë kapja dhe arrestimi në flagrancë i shtetasve: E. H., 22 vjeç, banues në Fier dhe M. G., 28 vjeç, banues në Portëz, Fier”, njofton policia.
Materialet do t’i kalojnë Prokurorisë pranë Gjykatës së Shkallës së Parë Fier, për veprat penale “Vjedhja me dhunë”, e kryer në bashkëpunim, “Plagosje e rëndë me dashje”, “Mbajtja pa leje e armëve dhe municionit luftarak” dhe “Moskallëzimi i krimit”.
