Një emigrant që ka mbërritur në Britaninë e Madhe me gomone përmes kanalit të “La Manshit” ka ndërruar jetë në ambientet e kampit “Manston” të azilkërkuesve.
Lajmi bëhet i ditur nga Home Office, por emri i personit që ka ndërruar jetë nuk është bërë i ditur ende.
Sipas mediave britanike azilkërkuesi ka mbërritur në Mbretërinë e Bashkuar javën e kaluar dhe është dërguar direkt në spital.
Më vonë ai u transportua në Manston. Të premten ai është sëmurur dhe fatkeqësisht ka ndërruar jetë mëngjesin e sotëm.
“Një person që qëndronte në objektin tonë në Manston ka vdekur fatkeqësisht në spital këtë mëngjes pasi u bë keq. Ne shprehim ngushëllimet tona të përzemërta për të gjithë të prekurit. Ne e marrim jashtëzakonisht seriozisht sigurinë e atyre që janë në kujdesin tonë dhe jemi thellësisht të pikëlluar nga kjo ngjarje. Do të bëhet një ekzaminim pas vdekjes, kështu që nuk do të ishte e përshtatshme për të komentuar më tej në këtë moment”, thuhet në një komunikatë për shtyp të Home Office.
Lajmi vjen pas disa javësh polemikash rreth kushteve në qendrat e emigracionit në Mbretërinë e Bashkuar, veçanërisht në Manston.
Qendra e emigracionit, e projektuar për të qëndruar jo më shumë se 48 orë, aktualisht është shtëpia e shumë azilkërkuesve, përfshirë gra dhe fëmijë. Në këtë qendër janë stacionuar dhe qindra shqiptarë që kanë kaluar “La Manshin” me gomone gjatë muajve të fundit.
Ndërkohë, javët e fundit ka pasur raportime për infeksione të rënda në Manston, duke përfshirë difterinë dhe zgjeben, por qeveria thotë se nuk beson se ishte ky shkaku i vdekjes.
Një zëdhënës i Zyrës së Brendshme tha se “nuk ka asnjë provë në këtë fazë që sugjeron se kjo vdekje tragjike është shkaktuar nga një sëmundje infektive“.
“Ne e marrim sigurinë dhe mirëqenien e atyre që janë në kujdesin tonë jashtëzakonisht seriozisht dhe ofrojmë objekte shëndetësore 24/7 me staf mjekësor të trajnuar në Manston“, shtoi ai.
Pavarësisht se është ndërtuar për të strehuar deri në 1,600 njerëz në të njëjtën kohë, deri në fund të tetorit në Manston kishte më shumë se 4,000 emigrantë, duke përfshirë familje të reja që kishin qenë në qendër për më shumë se 30 ditë.
