Nga Boldnews.al
Agjencia e Mbikqyrjes Policore dhe Prokuroria kanë nisur hetim për të zbuluar rolin pasiv të drejtuesve të lartë policorë në Berat, pas zbulimit të një sere me kanabis në fshatin Kutalli, ku u gjetën 870 kg kanabis, si edhe rreth 100 punonjëse që pastronin lëndën narkotike.
Burime nga dy institucionet deklaruan për median se pjesë e verifikimeve hetimore janë drejtuesi i Policisë Vendore të Beratit, Edmond Targaj dhe të gjithë vartësit e tij kryesorë.
Ky hetim nisi, pasi aksioni i organizuar nga Drejtoria e Përgjithshme e Policisë së Shtetit, shmangu tërësisht bashkëpunimin me strukturat lokale policore në Berat.
Drejtori i lartë i uniformave blu, Neritan Nallbanit, deklaroi në një konferencë për media në 11 Tetor 2022 se “si rezultat i punës hetimore të kryer nga Departamenti i Policisë Kriminale në Drejtorinë e Përgjithshme të Policisë së Shtetit, mbështetur dhe me inteligjencë informative, rezultoi se në territorin e fshatit Rërëz, në disa sera në pronësi të shtetasit H. D., kryhej procesi i përpunimit të bimëve narkotike, të kultivuara më parë në këtë zone”.
“Bazuar në informacionet e grumbulluara, në orët e para të mëngjesit të datës 10.11.2022, nga Drejtoria kundër Narkotikëve dhe Trafiqeve, Drejtoria e Forcës së Posaçme Operacionale në Departamentin e Policisë Kriminale, me mbështetjen e Forcave të Ndërhyrjes së Shpejtë dhe në bashkëpunim të ngushtë me Prokurorinë pranë Gjykatës së Rrethit Gjyqësor Berat, u finalizua megaoperacioni policor i koduar “Stuhia”, vijoi më tej Nallbati.
Duket qartë që Policia Vendore e Beratit ka qenë tërësisht jashtë loje. Është shumë e çuditshme se si zyrtarët policorë lokalë nuk kanë pasur asnjë informacion mbi këtë fermë kanabisi, ku punonin dhjetra gra, të cilat mbërrinin në fshatin buzë rrugës kryesore, nga zona të tjera të Shqipëri, përfshirë Shkodrën, Lezhë, Kamzën, e të tjerë.
Dyshimet e para janë që funksionarët policorë të Beratit mund të jenë të përfshirë aktivisht në lejimin e këtij aktiviteti gjigand të paligjshëm.
Shigjetat kryesore bien mbi drejtorin e Policisë së qytetit, Edmond Targaj.
Drejtori Targaj konsiderohet si një prej njerëzve të besuar të Ministrit të Brendshëm, Bledi Çuçi.
Ai u emërua në krye të policisë së Beratit në korrik të vitit 2021, me firmën e ish-drejtorit të Përgjithshëm të Policisë, Ard Veliu, i cili sot drejton Agjencinë e Mbikqyrjes Policore (AMP).
Targaj ishte i vetmi drejtues që nuk u prek nga rrokada e ndërmarrë nga pasuesi I Veliut në krye të Policisë së Shtetit, Gledis Nano.
Në rreth 11 muaj që qëndroi në drejtimin e policisë, Nano ndryshoi dhe qarkulloi 11 nga 12 drejtorët vendor të uniformave blu në qarqe.
Edmond Targaj nuk lëvizi nga qarku i Beratit, i cili është edhe zona elektorale e ministrit Çuçi.
Ai vijon të mbajë këtë detyrë edhe me drejtorin e ri të Policisë, Muhamet Rrumbullaku.
Kjo situatë forcon bindjen që Targaj është investim direkt i Çuçit dhe veprimtaria e tij është e mbështetur fuqishëm nga Ministri i Brendshëm.
Pas zbulimit të fermës së kanabisit në Kutalli, ngrihet një pyetje shumë bazike-a ka vepruar (mos-vepruar) Edmond Targaj me bekimin e shefit të tij politik, Bledi Çuçi?
Hetimet e nisura, më së paku për “shpërdorim detyre”, ndoshta mund të nxjerrin ndonjë rezultat për përfshirjen e policisë në ndihmë të narko-trafikantëve.
Megjithatë, duhet parë nëse AMP-ja e Ard Veliut, e cila është në varësi të Bledi Çuçit, do të arrijë deri tek Edmond Targaj, drejtori i besuar i ministrit të brendshëm.
