Nga Boldnews.al
Armando Fezga, kreu i Sindikatës së Kontrollorëve të Trafikut Ajror, i proceduar dhe arrestuar me shumë bujë në muajin prill të vitit 2021, është diskriminuar. Madje, eprorët e kanë kërcënuar dhe kanë marrë masa të njëanshme, në formën e “hakmarrjes se kërkonte mbrojtje për punonjësit”.
Ky është konkluzioni i Komisionerit për Mbrojtjen nga Diskriminimi, Robert Gajda, i cili me një vendim voluminoz, ka rrëzuar “flluskën” e ngritur nga ministrja Belinda Balluku, për sabotazh.
Në fakt, ky kontrollor u akuzua se kishte sabotuar hapësirën ajrore shqiptare, kishte organizuar protestë, grevë. Por, në këtë vendim që disponohet nga BoldNews.al, janë “rrëzuar” të gjitha ato që thanë Balluku, Bonati, Kusta apo edhe drejtoresha aktuale Laureta Omeri.
Por, ky nënshkrim masiv është pasuar nga hakmarrja primitive e krerëve të Albcontrol-it dhe ministrisë. “Në datën 7 prill 2021, punëdhënësi ka paraqitur kallëzim penal ndaj ankuesit për veprën penale të ‘shpërdorimit të detyrës’ (pa qenë fare në detyrë). Më tej, pas arrestimit të tij në datën 7 prill 2021 (ditë të cilën ishte pushim) mbi kallëzimin e punëdhënësit dhe zbatimit të masës së shtrëngimit personal, ankuesi është pezulluar nga detyra si supervizor TWR, deri në një vendim të formës së prerë të organeve gjyqësore”, thuhet në vendim.
Në datën 5 nëntor 2021, atij i është pezulluar licenca, ndërkohë që në datën 30 dhjetor 2021, Albcontrol e ka njoftuar për fillimin e procedurës për ndërprerjen e marrëdhënies së punës.
“Dhënia e paaftësisë së përkohshme e datës 06.04.2021 kishte ndikuar direkt në menaxhimin afatshkurtër me burime njerëzore në sallën operacionale dhe ka cënuar sigurinë dhe vazhdueshmërinë pa ndërprerje të shërbimit të lundrimit ajror që ka sjellë humbjen e besimit. Në datën 06.01.2022, në orën 10.00, ankuesi është paraqitur pranë zyrës së Drejtoreshës Administrative D.C, ku i është komunikuar humbja e besimit, por pa i komunikuar se cilat ishin arsyet e thyerjes së besimit. Në përfundim të takimit, ankuesi ka refuzuar të nënshkruajë procesverbalin, pasi çdo gjë që ai kishte deklaruar ishte deformuar dhe transformuar. Gjatë takimit, ankuesi ka deklaruar se ky ishte një veprim diskriminues për shkak të faktit se ai ishte Kryetari i Sindikatës dhe se ai nuk mund të ishte përgjegjës për veprimet e kolegëve. Pra, si ka mundësi që asnjëri prej tyre nuk paska cënuar sigurinë në punë por e ka cënuar ankuesi që ishte pushim?!” thuhet në vendim.
Madje, Komisioneri ka analizuar edhe kallëzimin e krerëve të Albcontrolit ndaj tij.
“Nuk shpjegohet, po ashtu se përse kallëzimi penal është paraqitur nga punëdhënësi vetëm ndaj ankuesit dhe jo ndaj 45 kontrollorëve të tjerë, ndonëse faktet janë të njëjta për më tepër që në datën 07.04.2021 që është ndërprerë puna në aeroport, ankuesi ka qenë pushim dhe në detyrë kanë qenë të planizuar 27 kontrollorë të tjerë. Ashtu sikurse nuk shpjegohet se përse ndaj këtyre 45 kontrollorëve nuk është marrë ndonjë masë për pezullim nga puna, pezullim page apo pezullim licence, siç ka ndodhur në rastin e ankuesit” janë të tjera pikëpyetje. Sipas vendimit, e gjitha kjo ka të bëjë se Fezga ka kundërshtuar ndërprerjen e pagës në masën 70 % të kontrollorëve, si kreu i Sindikatës. “Për asrye të këtyre kundërshtimeve, për kërkimin e pagës së ulur, ankuesi pretendon se është vënë në shënjestër nga ana e organeve drejtuese të kompanisë. Madje jo në pak raste për këtë nismë, janë ofenduar, përbuzur, si të pandjeshëm ndaj faktit që kërkonin kthimin e rrogës”, vijon vendimi.
Në fund, Komisioneri për Mbrojtjen nga Diskriminimi, Robert Gajda, ka konstatuar “diskriminimin e ankuesit, në të drejtën për punësim dhe profesion, për shkak të gjendjes shëndetësore dhe përkatësisë në sindikatë, në formën e diskriminimit ndërsektorial, si dhe në formën e rëndë të tij, nga ana e Shoqërisë Albcontrol sh.a. Gjithashtu, shoqëria Albcontrol sh.a, të marrë masa për rivendosjen në vend të të drejtës së shkelur duke rikthyer ankuesin A.F në pozicionin e mëparshëm të punës, si dhe për ushtrimin e privilegjeve të licencës së KTA-së”.
