Ka nisur me debat dhe tension seanca e sotme plenare. I pari që e mori fjalën ishte kryetari i Partisë Demokratike, Sali Berisha i cili e nisi me akuza të forta në drejtim të kryeministrit Edi Rama lidhur edhe me gjuhën e ashpër që përdori në seancën e shkuar në Kuvend.
Nënkryetarja e Kuvendit, Ermonela Felaj i ndërpreu Berishës fjalën, me gjestin që nuk u prit mirë nga kreu i selisë blu, i cili vazhdoi të fliste. Pak pas kësaj, Felaj i fiku mikrofonin Berishës.
Menjëherë pas këtij incidenti në start, fjalën e mori deputetja e Partisë Demokratike, Alban Vokshi, e cila kërkoi që të merret masë disiplinore ndaj kryeministrit Edi Rama për gjuhën e përdorur nga ai.
“Është gjuhë e papranueshme. Kam kërkuar nga gratë deputetë që të distancohen nga gjuha e tij. Kërkoj që të merret masë që të përjashtohet Edi Rama, siç u mor masa e padrejtë për dy kolegët e PD. Të mblidhet komisioni dhe të merret masa për përjashtimin e tij”, tha Vokshi.
Debati u ndez edhe kur Kuvendi hodhi poshtë edhe një kërkesë të shtatë deputetëve të opozitës për të bërë debat gjatë seancës së sotme lidhur me mandatin e deputetes së PS-së, Olta Xhaçka.
Në nisje të seancës nënkryetarja e Kuvendit Ermonela Felaj tha se në asnjë rast kur është votuar për mbarimin e mandatit të një deputeti, nuk është bërë debat në seancë.
“Kërkesa e 7 deputetëve për mbarimin e mandatit të deputetes Olta Xhaçka nuk qëndron. Në rendin e ditës së seancës së sotme është miratimi i dy raporteve të dy relatorëve. Në asnjë rast sipas rregullores nuk ka pasur debat për çështje të tilla. Kërkesa për zhvillimin e debatit nuk do të pranohet”, tha Felaj.
Si kundërpërgjigje për këtë lëvizje, Albana Vokshi tha se mazhoranca po vazhdon misionin për t’i mbyllur gojën opozitës.
“Ajo që po tentoni të bëni, është që po tentoni t’i mbyllni gojën opozitës. Nuk i referohem kësaj seance, por dhe seancave të tjera, na kemi hequr të drejtën e fjalës ne deputetëve, grupeve të interesit. Nuk është parë ndonjëherë që mos të jepet fjala. Ju shkelni në mënyrë të vazhdueshme rregulloren. Këtu po mbroni ministrat tuaj që po rrëmbejnë pronat”, tha Vokshi.
PËRPLASJET NË KUVEND:
Berisha: Ky procesverbal përmban gjuhën e një ordineri, e cila është e denjë vetëm atë që ka si moral dhe si psikologjinë, moralin dhe psikologjinë e xhelatëve paraardhës të tij.
(Berishës i ndërpritet fjala)
Felaj: Nëse procesverbali është zbardhur korrekt, atëherë quhet i miratuar. Nëse nuk është zbardhur korrekt…Rregullorja e Kuvendit është e qartë.
Berisha: Më dhatë fjalën…
Felaj: Po iu a dhamë por në bazë të procesverbalit.
(Berishës i fiket mikrofoni)
Albana Vokshi: Ajo që po tentoni të bëni, është që po tentoni t’i mbyllni gojën opozitës. Nuk i referohem kësaj seance, por dhe seancave të tjera, na kemi hequr të drejtën e fjalës ne deputetëve, grupeve të interesit. Nuk është parë ndonjëherë që mos të jepet fjala. Ju shkelni në mënyrë të vazhdueshme rregulloren. Këtu po mbroni ministrat tuaj që po rrëmbejnë pronat.
Duam që të merret masë ndaj Edi Ramës. Vajzat e mia janë tmerruar nga gjuha e kryeministrit, gjithë fëmijët po ashtu. Ky është shembulli që i japim fëmijëve tanë? Është gjuhë e papranueshme. Kam kërkuar nga gratë deputetë që të distancohen nga gjuha e tij. Kërkoj që të merret masë që të përjashtohet Edi Rama, siç u mor masa e padrejtë për dy kolegët e PD. Të mblidhet komisioni dhe të merret masa për përjashtimin e tij.
Felaj: Për sa i takon drejtimit të komisioneve parlamentare ai qëndron autonom në raport me drejtimin e seancën plenare. Për pikën që patë kërkesë, sqarimi është i plotë. Nuk ka nevojë për komente të natyrës nuk jemi objektivë. Kur iu hoq mandati Ilir Beqjas dhe në atë rast nuk pati debat.
