Një person ka mbetur i vrarë dhe një tjetër është plagosur nga të shtënat me armë zjarri para një shkolle të mesme në Florida.
Në fund të një loje në shkollën e mesme Orlando Jones të shtunën mbrëma, një person i armatosur qëlloi disa herë në parking gjatë një përleshjeje mes dy grupeve, tha shefi i policisë lokale Eric Smith, raportoi AP.
Gazeta “Orlando Sentinel” raportoi se pas të shtënave, lojtarët dhe spektatorët u larguan në anën e kundërt të stadiumit.
Policia mbërriti në parking dhe gjeti një person të vdekur dhe një tjetër të plagosur, shtoi Smith.
Katër të mitur janë arrestuar dhe njërit prej tyre i është gjetur një armë.
