Kryeministri Edi Rama nuk heq dorë dhe së fundmi nga Shkupi ka deklaruar se “Ballkani i Hapur” i ka dhënë provat e dobishmërisë në fushën e importeve dhe eksporteve. Rama tha se ky është një potencial i madh për të ardhmen e vendeve të Ballkanit Perëndimor.
Pyetja: A ja vlen të vazhdohet me “Ballkanin e Hapur”?
Rama: “Ja vlen se kështu ndërron vendin lokomotiva me vagonët. Procesi i Berlinit është një lokomotivë, ajo u mor peng nga vagonët, në një moment të caktuar. Ne kemi shtyrë procesin, duke dhënë mesazhin që nuk kemi pse presim ato parime. Procesi nuk është i përjetshëm, Ballkani po. Nuk besoj se në jetë të jetëve duhet të na marrin përdore të tjerët apo jo. Ballkani i hapur na ka dhënë prova për dobishmërinë e tij në shifra. Mjafton të shikosh eksportet dhe importet e cila ka një rritje në vite dhe për mua është një shenjë e rëndësishme e potencialit që kemi për ta zhvilluar këtë gjë”, tha Rama në konferencë për mediat pas firmosjes së marrëveshjeve me Maqedoninë e Veriut”.
Ndërkohë në krahun tjetër, opozita ka kundërshtuar këtë nismë të iniciuar nga Rama dhe Vuçiç për të cilën thotë se favorizon Serbinë dhe lë pas Kosovën dhe dobëson interesat e vendit tonë.
