Ukraina po ndërton një mur në kufirin me Bjellorusinë. Një lajm i tillë është raportuar nga Kyiv Independent, duke cituar Kyrylo Tymoshenko, nënkryetar i zyrës së Presidentit ukrainas Volodymyr Zelensky.
Muri i betonit thuhet se do të përforcohet me tela me gjemba, një hendek dhe një argjinaturë për të forcuar kufirin me Bjellorusinë në Volyn Oblastin ukrainas.
Timoshenko theksoi se muri shtrihet në tre kilometra, dhe ndërtimi është duke u zhvilluar në rajonet kufitare të Rivne dhe Zhytomyr.
Bjellorusia është një aleat kyç i Moskës dhe për muaj të tërë Kievi ka denoncuar mundësinë e një sulmi edhe nga Bjellorusia.
Nga ana e tij Minsku ka raportuar vazhdimisht se nuk dëshiron që të dërgojë trupa në Ukrainë.
Por ndërkohë, rusët po dërgojnë ushtarë, armatime dhe avionë në Bjellorusi për të formuar një forcë të përbashkët, e cila sipas disa analistëve ushtarakë mund të hyjë në Ukrainën perëndimore në përpjekje për të penguar furnizimet me armë të NATO-s që vijnë nga Polonia.
