Kryetari i grupit parlamentar të Partisë Socialiste, Taulant Balla ka shkuar në spitalin e Lushnjës për të parë nga afër gjendjen shëndetësore të kryetarit socialist të bashkisë së Divjakës, Fredi Kokoneshi i cili pas një sherri është plagosur me thikë.
Sipas Ballës, Kokoneshi ndodhet jashtë rrezikut për jetën, po kështu edhe shoferi i tij Gazmir Bullari. Balla tha se ky sulm është një produkt i kësaj ndasie dhe përçarje që ndodh çdo ditë në vendin tonë.
“Të dy janë nënshtruar ndërhyrje kirurgjikale shpresoj që çdo gjë të shkojë mirë për të dy. Është një ngjarje e rëndë. Është produkt i kësaj ndasie dhe përçartje që ndodh çdo ditë. Shpresoj që çdo qytetar shqiptar ta kuptoj që në këto ditë të vështira luftë të jemi të bashkuar dhe jo të përçare”, tha fillimisht Balla.
Socialisti më tej tha se të dy ata janë duke luftuar me jetën. I pyetur nëse ngjarja ka ardhur si rrjedhojë e heqjes nga puna e autorit si specialist IT në bashki, Balla tha: “Ju mediat keni një huq shumë të keq. Edhe kur ka fatkeqësi ju e çoni gjuhën mbrapsht. Lëni policinë dhe drejtësinë të bëjnë punën e vet, sepse t’I marrësh jetën tjetrit nuk ta justifikon për asnjë gjë. Dy persona sot luftojnë për jetën. Unë nuk e di kush është arsyeja. Unë di që një I çmendur ka marrë thikën, ka dalë nga shtëpia dhe ka shkuar të godasë. Burimi I kësaj ndasie dhe urrejtje duhet të ndalet. Mjaft më duke vrarë njëri-tjetrin”.
Si ndodhi ngjarja?
Kryetari i Bashkisë së Divjakës, Fredi Kokoneshi ka pasur një debat me shtetasin Ergest Xhelili, i cili gjatë konfliktit e ka goditur me thikë. Xhelili ka plagosur gjithashtu me thikë edhe shoferin e Kokoneshit. Erges Xhelili është arrestuar menjëherë pas ngjarjes.
Xhelili është një ish-punonjës i sektorit të IT në bashkinë e Divjakës. Bashkëshortja e Xhelilit aktualisht punon si shefe e infermiereve në Poliklinikën e Divjakës, aty ku edhe raportohet se ka ndodhur edhe ngjarja, por ende janë të paqarta arsyet të cilat e shtyn atë që të plagoste kreun e bashkisë.
