Media britanike The Telegraph shkruan se një fluks i madh emigrantësh shqiptarë pritet të mbërrijnë të premten në Britani përmes kanalit La Manshi, për shkak të parashikimeve për një mot të mirë.
Paralajmërimi erdhi pasi trafikantët kanë reklamuar në rrjetet sociale se mjetet e transportit do të jenë në kushte 100 përqind të mira.
Personat që merren me transportin, përdorin zakonisht rrjetin social TikTok për të reklamuar trafikun, ndërkohë që tregojnë se udhëtimi do të jetë i sigurt pasi deti do të jetë i qetë pas një jave të mbushur me stuhi që vështirësuan kalimin e Kanalit Anglez.
Në një nga reklamimet e bërë nga trafikantët, ku në sfond janë foto të shqiptarëve që udhëtojnë me gomone, shkruhet se udhëtimi pritet të jetë i lehtë.
“Udhëtim në Angli me gomone. Nisja e udhëtimit nga Calais. Arritja në Dover. Super i sigurt. I sigurt 100,000 përqind. Nisja bëhet në datën 11”, shkruhet në TikTok.
Telegraph shkruan se ministrat britanikë kanë frikë se deri në 10,000 emigrantë të tjerë mund të arrijnë në Mbretërinë e Bashkuar deri në fund të vitit.
