Kryeministri, Edi Rama nuk ka pranuar të japë përgjigje se kush janë zotëruesit e vërtetë të 60% të kompanisë që ai po u jep portin e Durrësit, ose më shumë se 1 milionë metër katrorë tokë, pronë publike e shqiptarëve.
I pyetur nga gazetarët në lidhje se kush janë pronarët e vërtetët të kompanisë që pretendon të investojë 2 miliardë Euro në portin e Durrësit, Rama zgjodhi ti shmanget pyetjes, duke thënë: ‘Nuk merrem me këto konvulsione injorante”.
“Ne nuk kemi miratuar asgjë. Ne kemi futur për diskutim me procedurë të përshpejtuar një marrëveshje strategjike që është e mirë për të gjithë, sepse sjell një investim prej 2 miliardësh për të ndërtuar portin turistik më të madh të Mesdheut’, tha Edi Rama, që më pas nisi të mbrojë projektin, që nuk është aspak transparent.
Opozita nga ana tjetër e cilëson projektin e portit të Durrësit një aferë më të madhe se ajo e inceneratorëve.
Kryetari i PD-së, Sali Berisha u shpreh dje se portin po e merr klani Rama-Vuçiç-Karriç, bashkë me Llukashenkon e Bjellorusisë.
“A e dëgjuat ju se si me procedurë urgjente po sjellin në parlament ligjin e privatizimit për veten e tij dhe Aleksandër Vuçiç të Portit të Durrësit. Porti i Durrësit ka një territor 1.2 milionë metër katror. Porti i Durrësit përbën si truall ndërtimi me vlerë minimumi 3 miliardë Euro. Porti i Durrësit i zhvilluar në ndërtime siç pretendon ai Dubai City, mund të shkojë në vlerë edhe 3 miliardë të tjera. Por kush janë këta që marrin portin? A ka shqiptarë që e dinë? Jo. Ju bëj thirrje durrsakëve të pyesin, se kush janë këta që po marrin portin e Durrësit. Kush e merr këtë pasuri përrallore publike të shqiptarëve. Ua them unë kush e merr. E merr një kompani në pamje të parë emiratesh, por në pamje të parë në thelb, Edi Rama, Aleksandër Vuçiç, Nebojsha dhe Dragomir Karriç, pra kompanitë e vëllezërve Karriç të cilët të gjithë aksionet i kanë me Llukashenkon e Bjellorusisë. Pra në vend që këtë pasuri ta gëzojnë shqiptarët, portin e tyre mijëra vjeçarë ta zgjerojnë, shndërrohet në pasuri private të klanit Rama-Vuçiç-Karriç dhe Aleksandër Llukashenkos”, deklaroi Berisha.
“Ai mund të thotë se këta nuk janë të vërteta? Dil e thuaju shqiptarëve se nuk janë të vërteta o hajdut. Kush janë pronarët e vërtetë të kësaj kompanie. E njëjta skemë përdoret në këtë rast, përjashtim nga taksat. Identike skema që Llukashenko ka përdorur me vëllezërit Karriç. Pra çfarë po ndodh me qytetarin. Pasuritë publike po shndërrohen në mallkim për qytetarin dhe parajsë për qeveritarët. Kjo ndodhte vetëm në sistemet mizore koloniale dhe kurrë në sistem demokratik”, shtoi ai.
