Prej tre ditësh në vendin tonë është zhvilluar një operacion policor i iniciuar nga SPAK në bashkëpunim me autoritetet spanjolle, të cilat kanë sjellë agjentët e tyre në terren për të goditur një rrjet të call-centerave që mashtrojnë të huaj përmes investimeve në bursa fiktive.
Përfaqësuesit e SPAK në një konferencë për mediat bënë me dije se hetimet që kanë më shumë se një vit që ka nisur janë kryer për Call Centera në Elbasan, Vlorë dhe Tiranë.
Në hetim janë përfshirë në total 8 vende, midis tyre Shqipëria, Spanja, Ukraina, Letonia, Finlanda dhe Suedia.
Numri i viktimave të këtij mashtrimi të madh në internet llogaritet në qindra mijëra. Gjatë operacioneve që mbajnë datën 8 dhe 9 nëntorit në Shqipëri, Bullgari, Gjeorgji, Maqedoninë e Veriut dhe Ukrainë, u kontrolluan 15 qendra telefonike dhe u arrestuan 5 të dyshuar.
Kraja tha se tetë vendet po hetojnë një skemë abuzive të një grupi kriminal në fushën e mashtrimit të kriptomonedhave.
“Kemi 1 vit që kryejmë hetime në Suedi, Gjermani e në vende të ndryshme. Operacioni u shtri në 8 shtete, Suedi, Shqipëri, Finlandë, Gjeorgji, Gjemani, Letoni, Spanjë dhe Ukrainë. Në një hetim të përbashkët kundër një aktivitet kriminal të shtrirë në shumë shtete. Jemi të vendosur për ti hetuar këto aktivitete. U bëmë të gjithë së bashku kundër një aktiviteti kriminal. Jemi të ndërgjegjshëm e të vendosur për të hetuar këto aktivitete, sepse mendojmë se janë të rrezikshme për të gjitha shtetet, për shoqërinë nga pasojat që sjelli dhe skemat e pastrimit të parave. U bëj thirrje shtetasve shqiptarë qoftë në nivel biznesi apo personash të punësuar, të mos përfshihen në këto aktivitete që për momentin sjellim përfitim por kanë pasojë dënimin dhe ndëshkueshmërinë. Kishin përfituar 50 milionë euro në vetëm tre muaj aktivitet”, tha kreu i SPAK.
Sakaq, drejtori i Përgjithshëm i Policisë së Shtetit, Muhamet Rrumbullaku tha: “Sulmet kibernetike na kanë bërë më vigjilentë. Krimi, kryesisht ai mbi baza inteligjente por jo vetëm, mund të gjejë shtrirje kapilare në mbarë botën. Jemi duke punuar për të rialokuar burimet tona njerëzore, teknike dhe logjistike si dhe përshtatim strukturat. I kemi dhënë vetes objektiv që fillimi i vitit që vjen të na gjejë me një strukturë të dedikuar. Do të ngremë një strukturë e posaçme brenda departamentit të policisë kriminale, e shtrirë në të gjithë strukturat e drejtorisë së policisë së Shtetit. Do të shtojmë kapacitetin njerëzor”.
Eurojust dhe Eurpol mbështetën aksionin kundër mashtrimit me investime që përfshin përdorimin e kriptomonedhave me kërkesë të autoriteteve spanjolle, gjermane dhe të Finlandës.
“Shkalla e hetimeve në raste të tilla është e paprecedentë deri më tani. Qindra mijëra investitorë në të gjithë botën kanë rënë viktima të mashtrimit që të paktën që nga viti 2016, sipas hetimeve. Dëmi i shkaktuar llogaritet në 50 milionë euro në tremujor. Hetimet për mashtrimin kibernetik filluan në vitin 2018, ku aktualisht shtatë vende kanë hapur çështje gjyqësore kundër OCG“, thuhet në deklaratën e Eurojust.
NJOFTIMI I SPAK:
Si rezultat i këtij operacioni ndërkombëtar, në Shqipëri janë kontrolluar qendrat e thirrjeve apo ambjente në Tiranë, Elbasan dhe Vlorë të cilat gjatë periudhës hetimore kanë patur dhe ndryshime vendodhjesh, emërtimesh por dhe bashkime më njëra tjetrën për efekt të fshehjes nga organet ligjzbatuese.
Janë kryer 11 kontrolle qendrash thirrjeje dhe banesa,
Janë arrestuar/ndaluar 4 shtetas të dyshuar (2 nga SPAK dhe 2 në bazë të kërkimit ndërkombëtar) si dhe janë shpallur në kërkim 6 shtetas të tjerë (3 nga SPAK dhe 3 në bazë të kërkimit ndërkombëtar), si organizatorë të këtij aktiviteti kriminal.
Janë sekuestruar:
- Rreth 300 pajisje kompjuterike, laptop, usb, hard disqe,
- Prova të tjera dixhitale dhe dokumente të shumta.
- Portofole kriptovalutash ne vleren aferisht 15.000 USD dhe cash 90.000 euro,
- Dokumente identifikimi të shtetasve lituaneze dhe gjeorgjiane, karta banke lituaneze etj.
Në bashkëpunim të ngushtë me autoritetet gjyqësore pjesmarrëse në këtë skuadër të përbashkët hetimore, bazuar në provat e sekuestruara, të cilat po analizohen, po vazhdojnë hetimet për dokumentimin e plotë ligjor të aktivitetit kriminal,
Detajet për krijimin e skuadrës së përbashkët hetimore, si dhe rezultatet e këtij operacioni ndërkombëtar janë dhënë në një komunikatë për shtyp të Eurojust të datës 10.11.2022.
