Gjuha e mbushur me epitetet fyese që kryeministri Edi Rama përdori në seancën plenare të ditës së djeshme u kritikua ashpër në Kuvend nga deputetja e Partisë Demokratike, Albana Vokshi.
Teksa mori fjalën në Foltore, Vokshi kërkoi marrjen e një mase disiplinore ndaj Ramës. Ajo gjithashtu kërkoi nga deputetët që të braktisin sallën në momentin që kreu i qeverisë nis e rreshton një lumë ofendimesh si kryedhunues verbal.
“Jam e sigurt që çdo qytetar që e kishte këtë mundësi ka qenë para TV për të dëgjuar kryeministrin që të fliste mbi buxhetin, mbi ndarjen e tij dhe për pensionet e tyre. Po çfarë dëgjuan dje nga kryeministri, fyerje, nënçmime, ofendime. Si deputetet jam e turpëruar që Rama ka folur kështu në këtë sallë. Si prind jam e zemëruar që ai lejohet të flasë kështu. Në media kudo në vend ishin lajmet, Rama shan opozitën, bedelë e krye bedelë. Në vend të buxhetit, shqiptarët dëgjuan ofendimet e kryeministrit. Në sallën e këtij parlamenti është krye dhunuesi verbal. Çdo deputet duhet që të ndahet nga kjo sjellje e dhunshme nga gjuha e kryeministrit. I bëj thirrje krye parlamentares që të marrë masa ndaj gjuhës së Ramës. Është e pafalshme që Rama të lejohet të flasë kështu në këtë sallë. Unë dhe çdo deputete duhet që të distancohemi dhe duhet që të dalim nga kjo sallë nëse Rama flet kështu me këtë gjuhë. Çdo gazetar duhet që të distancohet dhe të mos bëj lajme për Ramën. Ky është mallkimi që po largon të rinjtë nga ky vend. Vota ime kundër buxhetit është kundër”, tha Vokshi.
Vokshi gjithashtu ironizoi ministret e qeverisë dhe në veçanti Ministren e Shëndetëisë, Ogerta Manastirliu dhe ministren për Parlamentin, Elisa Spiropali.
“E di që prekeni shumë zonja ministre kur shahet kryeministri, por më vjen keq”, iu përgjigj Vokshi reagimeve të tyre.
Ato po komentonin pas shpine pa mikrofon fjalën e deputetes së PD, edhe sepse Vokshi gjatë fjalës së saj ka përmendur edhe tendera sekretë në Shëndetësi.
“Edhe buxheti i Shëndetësisë për 2023 shkon për koncesionet, miqtë dhe sponsorët e kryeministrit. Ministrja dhe kryeministri në kulmin e pandemisë bëjnë tenderë sekretë për të vjedhur me paratë e monitorëve, respiratorëve, maskave dhe letrave higjienike madje. Pra këtu do shkojnë paratë e shëndetësisë edhe në 2023”, nënvizoi Vokshi.
