Dëshmia e mikes saj detyroi autoritetet të reagonin, por ngjarja mbetet e mbuluar nga misteri. 22-vjeçarja nga Kenia e identifikuar me emrin Xhoi po lufton prej 13 Gushtit me jetën në Spitalin e Traumës, pasi dyshohet se për shkak të dhunës ka pësuar dëmtim dramatik të trurit.
Vajza e cila për pak kohë do të festonte ditëlindjen, duke planifikuar një udhëtim drejt familjes në Kenia, një ditë përpara se të gjendej e masakruar nga mikja e saj poshtë pallatit ku jetonte në ‘Pandeli Vangjeli’ Tiranë, kishte folur me të ëmën. Kjo e fundit, e cila në një intervistë për Syri Tv, tha se quhej Ruth, thotë se në bisedën e fundit, vajza dukej e lumtur dhe mezi priste kthimin pranë familjes.
E teksa Policia e kryeqytetit reagoi vetëm pasi lajmi u publikua në media, nëna e të resë keniane hedh akuza të forta ndaj autoriteteve në vendin tonë. Sipas saj, deri në momentin e publikimit të fakteve, Policia ka pretenduar se ishte tentativë për vetëvrasje.
Ndërkohë Suzi një bashkëkombase e Xhoit e cila është informuar se një vajzë nga Kenia kishte nevojë për gjak është kujdesur për të dhe ka treguar se mjeket I kanë thënë se Xhoi mund të vdiste që ditën e parë që ka mbërritur në spital, ajo thotë se policia nuk ka shfaqur interes për zbardhjen e ngjarjes.
Gjendja shëndetësore e 22- vjeçares është e rëndë, ajo nuk komandon dot trupin, dhe ka nevojë të vazhdueshme për kujdes edhe në të ushqyer aspo për të kryer nevoja bazike. Familjarët kërkojnë ta transferojnë në një spital më të specializuar jashtë vendit, por kushtet ekonomike e pamundësojnë.
Për këtë të afërm dhe miq të të resë, kanë bërë apel duke kërkuar ndihmë për sigurimin e shpenzimeve që nevojiten. Vetë Xhoi e ka të pamundur të komunikojë, teksa deri tani përveç pikëpyetjeve të shumta, mbeten dy qëndrime rreth dinamikës së ngjarjes.
Policia thotë se ka nisur në bashkëpunim me prokurorinë një hetim, teksa kjo e fundit ka regjistruar edhe procedim penal për ‘plagosje të rëndë me dashje’, duke lënë në hije se ndaj kujt dhe në çfarë rrethanash.
