Marrëveshja për portin e Durrësit ka marrë zyrtarisht dakordësinë e Ministrisë së Infrastrukturës dhe Energjisë dhe konsorciumi i kompanive nga Dubai me atë të krijuar rishtazi nga Autoriteti Portual i Durrësit do të marrin përsipër ndërtimin e Marinës së re.
Marrëveshja pritet të kalojë në komisionet parlamentare përkatëse dhe më pas në Kuvend për të marrë miratimin me shumicë të thjeshtë votash, duke i dhënë kështu jetë projektit që do të shohë portin tregtar të Durrësit, të zhvendosur në zonën e Porto Romanos.
Por për opozitën kjo marrëveshje është një megaaferë, e cila i hap rrugë përvetësimin e miliona katrorëve tokë publike nga ana e kryeministrit Edi Rama dhe klientëve të tij.
Në një dalje për mediat nga selia e Partisë së Lirisë, Ilir Meta paralajmëroi sot se projekti do të ketë pasoja katastrofike për ekonominë e vendit, ndërsa zbuloi se në lojë ka hyrë edhe një kompani offshore nga Dubai.
“Nuk ka asnjë informacion apo transparencë që do të parandalonin dëmet miliona euro për qytetarët shqiptarë. Në 27 tetor, sipas akteve të qeverisë na shfaqet si investitore dhe një kompani tjetër me bazë në Dubai e themeluar në 2015-ën, një kompani offshore. Është e qartë se kjo është aferë tipike mafioze kundër interesave kombëtare, strategjike edhe në drejtim të sigurisë kombëtare dhe të pozitës së Shqipërisë sa i takon rolit të saj sa i takon zhvillimit ekonomik të gjithë rajonit. Është aferë që mund të rezultojë me pasoja katastrofike për vendin dhe për mungesën e zhvillimit të së ardhmes dhe për vetë financat publike. Ndaj PL do të investojë më tej dhe do të bëjë përgjegjëse çdo autoritet”, tha Meta.
Po sipas kreut të PL skandali me aferën e portit të Durrësit po thellohet, pasi kryeministri Rama ka tentuar të bllokojë publikimin e projektit dhe bërjen transparente për publikun të shifrave të incestimit.
“Vazhdon të thellohet skandali i portit të Durrësit. Dali në pah dhe lidhjet e kryeministrit për të bllokuar transparencën. Zoti Vasili ka bërë disa pyetje muaj më parë. Ende sot pas gati 3-4 muajsh nuk ka asnjë përgjigje dhe asnjë llogaridhënie me këto pyetje. A është dhënë statusi kompanisë? Cila është kompania? Në memorandumin e përmendur nuk është EMAR Group. Cilat janë masat garantuese që porti i Durrësit mos të sekuestrohet nga bankat vendase”, nënvizoi Meta.
