Dy djemtë e radikalistit Gjergj Laçi kanë zbuluar detaje shokuese. Ndërkohë që radikalisti Xherxh (Gjergj) Laçi pretendon se nuk ka ushtruar dhunë ndaj gruas dhe fëmijëve të tij, të cilët i mbante të ngujuara prej 6 vitesh, të kundërtën thonë dy fëmijët e tij të mitur.
Në dëshminë tronditëse dy djemtë shprehen se “babai i tyre mbante thika në brez, ndërsa rrihte dhe e dhunonte nënën e tyre sistematikisht”.
Në dosjen e Prokurorisë, thuhet se njëri prej djemve “prej tre vitesh nuk është lejuar të dalë, babai i tyre i kërcënonte duke i thënë se nuk duhet të dilni sepse të tjerët duan që t’ju vrasin”.
Dy djemtë tregojnë se jetonin në kushte të vështira ekonomike, ushqeheshin vetëm nga ushqimet që i dërgonin familjaret, konkretisht xhaxhai dhe gjyshi, që nuk lejoheshin të futeshin brenda, po i linin ushqimet tek dera e banesës. Ata thonë se në oborr mund të luanin, por në darkë detyroheshin të futeshin herët brenda dhe të flinin, sidomos ditët e ftohta pasi nuk kishin ngrohje.
Një prej djemve tha se “unë dua ti kthehem një jetë normale dhe të shkoj në shkollë si gjithë bashkëmoshatarët. Gjithashtu kam dëshirë të ndjek një kurs futbolli”.
