Dy ditë pasi deklaruan bojkotin e çdo institucioni në Kosovë, Lista Serbe, 10 deputetë e kësaj force politike në Kuvend kanë dorëzuar sot zyrtarisht mandatet duke braktisur detyrën si ligjvënës.
Lajmin e ka bërë të ditur për mediat Ilir Kërçeli, shef i kabinetit të kreut të Kuvendit të Kosovës, Glauk Konjufca.
Të shtunën, në një konferencë për media kryetari i Listës Serbe, Goran Rakiç lajmëroi braktisjen e çdo institucioni qendror dhe në 4 komunat serbe në Veri të vendit.
“Ne kemi vendosur të largohemi nga të gjitha institucionet politike, Kuvendi, Qeveria, dhe nga katër komunat në veri të Kosovës, por edhe që të largohen serbët nga gjyqësori, policia si dhe stafi administrativ në katër komunat në veri”, tha ai.
Menjëherë pas deklaratës së Rakiç detyrën e lanë edhe serbë të cilët punonin si zyrtarë policorë në Drejtorinë Rajonale të Policisë së Kosovës në Mitrovicën e Veriut, po ashtu edhe në pikat kufitare.
Ndërkohë sot ish-efektivët serbë që braktisën detyrën kanë filluar nga ora 08:00 të dorëzojnë armët dhe uniformat e tyre në stacionin policor në veri të Mitrovicës.
Dorëzimi i pajisjeve të rreth 300 policëve të stacionit verior në Mitrovicë do të bëhet gjatë gjithë ditës së sotme me orare të ndryshme.
Mësohet se rreth 150 policë tjerë të cilët kanë shërbyer nëpër komunat tjera veriore të Kosovës do të dorëzojnë pajisjet e tyre po ashtu sot por nëpër stacionet e këtyre komunave.
