Policia gjermane ka arrestuar këtë të Hënë një 37- vjeçar me origjinë shqiptare.
Sipas mediave gjermane, shqiptari është arrestuar në Hamburg teksa ishte duke kaluar në kryqëzimin Netteral me makinë tip “Mercedes c 200”.
Gjatë kontrolleve rutinë të policisë, shqiptari ka paraqitur pasaportën e tij, ndërsa pretendoi se nuk kishte armë apo drogë me vete.
Deklarata e tij nuk i ka bindur policët të cilët kanë ushtruar kontroll në pjesën e pasme të automjetit, ku u gjetën dy pako me gjithsej 2.3 kilogramë kokainë të fshehura nën një mbulesë plastike në pjesën e motorit.
Vlera e sasisë së kokainës së sekuestruar, arrinte në 167 mijë euro. Pas kontrollit policia vuri në pranga shqiptarin, emri i të cilit për arsye hetimore nuk është bërë ende publik.
