Një efektiv i policisë rrugore në Vlorë është dhunuar nga një drejtues automjeti këtë të Hënë.
Mësohet se shoferi ka qënë nën efektin e alkoolit. Ngjarja ka ndodhur në rrugën Transballkanike.
Efektivi i policisë i ka bërë thirrje një automjeti për të ndaluar dhe i ka kërkuar drejtuesit të dalë nga makina. Drejtuesi i mjetit nuk i është bindur urdhrit të efektivit dhe për pasojë polici ka thirrur forcat e posaçme Shqiponja.
Në momentin që këta të fundit kanë mbërritur në vendngjarje drejtuesi i mjetit ka dalë nga mjeti dhe ka goditur me grushta efektivin e policisë rrugore.
Autori është shoqëruar në komisariat ndërsa efektivi i dëmtuar është dërguar në spital me plagë të lehta.
