Kryetari i Partisë së Lirisë, Ilir Meta kritikon sërish qeverinë se nuk po merr masat e duhura për t’u përballur me krizën energjetike. Duke ironizuar, Meta shkruan se ‘Rilindja’ lutet për reshje shiu ndërsa Europa po merr masat duke çuar rezervat e gazit në 100%.
Meta thotë se çmimi i energjisë ka rënë me 50% në krahasim me muajin shtator dhe pretendon se qeveria do të rrisë shumëfish çmimin për familjet shqiptare. Për masat e marra nga Europa bazohet në një artikull të prestigjozes amerikane CNN që tregon se si po bien çmimet.
Ndërkohë vë sërish theksin tek protesta e thirrur nga Sali Berisha duke pretenduar se do kundërshtojnë ato që i cilësojnë si vjedhje të ‘Rilindjes’.
“Aktualisht rezervat e gazit në vendet europiane janë 100%. Kjo është arsyeja pse çmimet e energjisë janë mesatarisht 150 euro/Mwh, pasi 36% e totalit të energjisë në Europë sigurohet nga gazi natyror me kosto 100 euro/Mw.
Ndërkohë që vendet e Bashkimit Europian kanë në dispozicion 50 anije gazmbajtëse të gatshme për t’u shkarkuar në terminalet LNG, Qeveria e “Rilindjes” ofron si zgjidhje të lutemi për rreshje.
Ndërkohë që çmimi i energjisë ka rënë me 50% në krahasim me muajin shtator, Qeveria e “Rilindjes” vendos të rritë shumëfish çmimin për familjet shqiptare.
Ndaj 12 Nëntori është dita e protestës kundër vjedhjeve monstruoze të “Rilindjes” në energji dhe kundër rrënimit të familjeve shqiptare dhe bizneseve”, shkruan Meta.
