Kryetari i AAK-së, Ramush Haradinaj thotë se kryeministri i Kosovës, Albin Kurti nuk është i interesuar për sigurinë e vendit, pasi ky i fundit nuk dëgjoi thirrjet e aleatëve për shtyrjen e vendimit për targat, deri në arritjen e marrëveshjes finale.
Përmes një postimi në rrjetet sociale, Haradinaj shprehet se Kurti nuk po punon në interes të sigurisë së vendit tonë e as të zbatimit të ligjit.Ai i bën thirrje kreut të qeverisë, që të dëgjojë kërkesën e partnerëve ndërkombëtarë.
“Ata që dalin jashtë kësaj kërkese nuk punojnë në interes të sigurisë së vendit tonë e as të zbatimit të ligjit. Kurti me demagogët e vet, qoftë në qeveri e qoftë jashtë saj, nuk janë me aleatët e sigurisë dhe as nuk janë të interesuar për sigurinë e Republikës së Kosovës;
Kjo situatë është bardh e zi.
Në vend që të vazhdohet me demagogji, menjëherë duhet të pranohet kërkesa e Amerikës, QUINT-it dhe aleatëve të tjerë të NATO-s për shtyrjen e vendimit për targat deri në Marrëveshjen Finale për njohje reciproke mes Kosovës dhe Serbisë”, shkruan ndër të tjera Haradinaj në Facbook.
Serbët kanë mbajtur një tubim këtë të diel në veri të Mitrovicës, ku kanë kënduar këngë nacionaliste dhe himnin e Serbisë.
Kryetari i Listës Serbe, Goran Rakiç deklaroi se serbët përmes dorëheqjeve nga institucionet e Kosovës, janë duke mbrojtur marrëveshjen e Brukselit.
