Presidenca e Kosovës ka reaguar pas vendimit të “Listës Serbe” për të braktisur të gjitha institucionet shtetërore në Prishtinë.
Blerim Vela nga zyra e Presidencës së Republikës së Kosovës ka thënë se Serbia është duke i detyruar dhe nxitur serbët që të braktisin punën e tyre në institucionet e Kosovës.
Ai ka thënë se një akt i tillë i ngjan nxitjes që Rusia bëri në Donbas në vitin 2014 dhe se Vuçiç synon të destabilizojë Kosovën duke shfrytëzuar Listën Serbe.
“Serbia po i detyron dhe nxit serbët e Kosovës që të braktisin punën e tyre në institucionet e Kosovës. Ky akt i ngjan nxitjes së Rusisë në Donbas në vitin 2014. Ajo gjithashtu tregon se Lista Serbe është “gllabëruar” dhe trajtohet si një mjet për të destabilizuar Kosovën nga regjimi i Vuçiçit”, shkruan Vela.
Por, si do të funksionojë tani qeveria e Kosovës?
Dhjetë deputetët e Listës Serbe në Kuvendin e Kosovës kanë dhënë dorëheqje sikurse edhe përfaqësuesit tjerë institucional serbë në institucionet e Kosovës.
Drejtori Ekzekutiv i Institutit të Kosovës për Drejtësi, Ehat Miftaraj, ka thënë se vendet e deputetëve serbë mbesin të lira nëse nuk plotësohen me kandidatët që kanë garuar në zgjedhjet e fundit nga ky subjekt.
“Kuvendi mund ta vazhdojë punën, por që pengesë mund të bëhet në rastin e miratimit të ligjeve që kërkojnë votat e shumicës së 2/3 së dyfishtë” , është shprehur Miftaraj.
“Nëse i referohemi Kushtetutës dhe vendimit të Gjykatës Kushtetuese për pozitat e garantuara, duhet të jenë domosdo nga partia që ka fituar më së shumti vota nga komuniteti serbe”, shtoi ai.
Miftaraj ka thënë se edhe ministri duhet të jetë nga Lista Serbe, derisa ka shtuar se mungesa e tij nuk prish punën në funksionimin e qeverisë.
