Emigrantët shqiptarë që udhëtojnë në mënyrë të paligjshme në Britaninë e Madhe, veçanërisht me gomone përmes kanalit La Manshi, vijojnë të jenë në qendër të mediave britanike të cilët po shkruajnë çdo ditë e më shumë për shqiptarët.
Debate ka pasur edhe mes politikanëve të dy vendeve.
Kryeministri shqiptar Edi Rama akuzoi Sekretaren e Brendshme Britanike, Suella Braverman, për ‘nxitjen e ksenofobisë’ pas deklaratës së saj ku e cilësoi ardhjen e shqiptarëve në Britaninë e Madhe si ‘pushtim’, duke i etiketuar edhe si kriminelë.
Ministri britanik për emigrantët, Robert Jenrick, e përshkroi deklaratën e zyrtares së lartë si të tepruar, edhe pse sipas tij, ardhja e emigrantëve eshte një sfidë për vendin pasi numri është dyfishuar nga viti i kaluar.
Së fundmi, emigrantët shqiptarë kanë paralajmëruar një protestë të madhe në kryeqytetin e Mbretërisë së Bashkuar më 12 nëntor ora 10:30 me kohën lokale. Protesta do të mbahet në “Westminster Bridge”.
