Bayern Munich ka mundur 3-2 Hertha Berlin në transfertë dhe është ngjitur përkohësisht në vendin e parë të renditjes së kampionatit gjerman të futbollit.
Siç shihet edhe nga rezultati, nuk ka qenë një fitore e lehtë për ekipin e Nagelsmann. Ka ndodhur gjithçka në pjesën e parë në ndeshjen e luajtur pasditen e sotme në Berlin.
Musiala ka zhbllokuar ndeshjen në minutën e 12-të dhe Choupo-Moting ka dyfishuar dhe trefishuar avantazhin e bavarezëve me një dygolësh të realizuar brenda një minute.
Choupo-Moting ka shënuar në shtatë ndeshje radhazi të kuajtura në të gjitha kompeticionet me Bayern-in dhe duket se është bërë “Lewandwoski i ri” i bavarezëve.
Kur gjithçka dukej e mbyllur, vendasit janë kundërpërgjigjur duke shënuar dy gola të shpejtë me Lukebakio në minutën e 40-të dhe me një penallti të Selke-s në të 45-ën. Bayern, megjithatë, ka arritur ta ruaj avantazhin deri në fundin e ndeshjes.
Fitore edhe për Borussia Dortmund, me verdhezinjtë që kanë mundur me rezultatin e pastër 3-0 skuadrën e Bochum. Edhe në ndeshjen e luajtur në Signal Iduna Park ka ndodhur gjithçka në pjesën e parë.
Protagonisti i sfidës ka qenë 17-vjeçari Moukoko, i cili ka realizuar një dygolësh dhe është bërë lojtari më i ri që shënon 10 ose më shumë gola në historinë e Bundesliga-s. Goli tjetër i verdhezinjve është shënuar nga Reyna me penallti.
