Takimi i kryeministrit Edi Rama në Tropojë nuk ka shkuar ashtu siç prite, teksa fjala i është ndërprerë nga një qytetar që ka thirrur “Rama ik” dhe “Rroftë Partia Demokratike”.
Për disa minuta Rama i injoroi thirrjet e qytetarit nga mesi i sallës, ndërsa në një moment e ndali fjalën e tij për t’i kërkuar Gardës që ta nxjerrë jashtë personin në fjalë.
“Merreni përcilleni, të lutem tani. Këtu u ekzagjerua, merreni përcilleni, e mbarove detyrën tani shko tek foltorja, hajde ec tani”, thotë Rama dhe më pas u drejtohet truprojave: “Mbajeni se po e lëshuat bie ai, nuk ecën dot vetë. S’ka problem, është ok.”, i tha Rama truprojave.
Me aq sa la të kuptohet, Rama u kërkoi të pranishmëve që ta mbajnë zotërinë pasi nuk mund të ecte vetë, duke nënkuptuar që mund të ishte në gjendje të dehur.
Incidenti ndodhi në një moment kur kreu i qeverisë po fliste rreth financimeve ruse në Partinë Demokratike.
