Gara në Primaret e Partisë Demokratike për kandidatin që do të përfaqësojë opozitën në zgjedhjet lokale të 14 majit përballë Erion Veliajt është bërë më e nxehtë se kurrë, me tre figura që kanë zyrtarizuar deri më tani kandidaturën.
Një pyetje në lidhje me këta tre emra, nuk kishte si të mungonte as në drejtim të kreut të Partisë së Lirisë, Ilir Meta në konferencën e sotme për mediat.
I pyetur se cilin prej Këlliçit, Bogdanit apo Alimehmetit do të mbështeste, Meta refuzoi të përmendte emra konkretë por tha se PL do të mbështesë kandidatin që do të gëzojë mbështetjen më të madhe nga “Primaret”.
“Emrat janë njëri më i mirë se tjetri. Procesi është një hap shumë pozitiv. i ftoj të gjithë kandidatët të shpalosin platformat e tyre për rivendosjen e llogaridhënies në Bashkinë e Tiranës. Mbështesim procesin, cilido kandidat që do fitojë do gëzojë edhe përkrahjen e kolegëve të tjerë që Tirana t’i ikë nga duart tiranëve”, tha ai.
Meta gjithashtu sqaroi se nëse PL do të ketë kandidatë të kësaj që pretendojnë se mund të fitojnë në zona të caktuara, ata do t’i paraqiten PD-së.
“Sot do të jetë mbledhja e parë e Kryesisë së zgjedhur mbrëmë. Në këtë mbledhje do të përcaktohet edhe mënyra se si do të merren në konsideratë të gjithë ata kandidatë që pretendojnë se mund të kontribuojnë në fitoren e opozitës. Për këto raste do të bisedohet me PD-në, duke respektuar marrëveshjen që ne kemi nënshkruar me të, duke respektuar “Primaret””, shtoi Meta.
