Kush e vrau Briken Sanajn? Tre ditë pas ekzekutimit, ende asnjë gjurmë nga autori

Edhe pse kanë kaluar tre ditë nga vrasja e 39-vjeçarit Briken Sanajt në Kodrën e Diellit në Tiranë, Policia dhe Prokuroria nuk kanë asnjë gjurmë të autorit.

Mësohet se agjentët kriminalistikë i janë rikthyer edhe një herë vendngjarjes, për të rindërtuar dinamikën. Janë këqyrur gjithashtu pamjet që kanë regjistruar kamerat për një javë, për të zbuluar nëse përgjatë zonës ka pasur lëvizje të personave të dyshimtë, por diçka e tillë nuk u ka rezultuar.

E vetmja kamer sigurie e vendosur përballë garazhit ku 39-vjeçari parkoi mjetin pasi u kthye nga dasma e mikut të tij të ngushtë në Shëngjin, ka fiksuar momentin e vrasjes së Sanajt, por jo autorin i cili mësohet se qëndronte i fshehur pas një peme ulliri.

Si pistë kryesore vijon të jetë ajo e vrasjes për shkak të hasmërive të vjetra mes familjes Sanaj me një familje me origjinë nga Puka. Vëllai i 39-vjeçarit, 10 vite më parë plagosi në Lezhë një person të asaj familjeje, pas konflikteve për ngacmimin e një vajze.

Veç hakmarrjes, hetuesit po analizojnë edhe ndonjë konflikt tjetër të mundshëm që mund të kenë pasur dy vëllezërit Sanaj jashtë territorit shqiptar duke kërkuar edhe ndihmën e homologëve.