Braziliani Patrik ishte një nga heronjtë në sfidën me Kukësin, ku shënoi një gol për t’u pasur zili. Në një intervistë për “Panoramasport”, braziliani i bardhebluve foli për golin, por edhe Tiranën që kërkon titullin kampion.
Lojtari luan si në qendër dhe në krahun e majtë. Sulmuesi është vetëm 24 vjeç, ndërkohë që lojtari ka një eksperiencë të madhe në Austri. Skuadrat ku ka luajtur Patrik janë disa: Admira Vaker, FK Kabala, SV Horn, Friburguense-RJ, Bonsucesso FC, América-RJ.
Lojtari vlerësohet 300 mijë euro në merkato. Sezonin e fundit ai ka qenë te Kabala, ku është aktivizuar në 21 ndeshje, 8 në Bundesligën austriake, tri në Kupën e Austrisë dhe 10 me Kabalën në Azerbajxhan.
Goli i parë në Superiore- “Jam i lumtur për golin e parë që shënova me fanellën e Tiranës në Kategorinë Superiore. Dua që të shënoj sërish dhe të ndihmoj skuadrën time për të shënuar të tjerë gola në takimet e ardhshme.”
Tirana mbron titullin kampion? “Besoj se po. Shpresoj shumë që të rifitojmë titullin kampion. Ama duhet të luftojmë ndeshje pas ndeshjeje, duke qenë më afër njëri-tjetrit. Nëse e bëjmë këtë është e sigurt që e fitojmë titullin kampion.”
Mbështetha e Orges Shehit për sulmuesin- “E falënderoj trajnerin për fjalët dhe përkrahjen. Ka folur me mua disa herë dhe më beson në formacion. Po kështu edhe shokët e skuadrës kanë bërë të njëjtën gjë. Jemi të gjithë si një familje e madhe.”
