Policia greke në Igumenicë ka sekuestruar rreth 59 kilogramë marijuanë në një kamion, me lëndën narkotike që dyshohet se ka hyrë nga kufiri i gjelbër me Shqipërinë.
Ka qenë një ndalesë rutinë e oficerëve të patrullës së Paramithisë që ka çuar në zbulimin e kamionit me drogë, që transportonte mallra drejt Athinës.
Ata kanë pikasur kamionin me targa të huaja të parkuar në anë të rrugës, ndërsa në vendin e shoferit ndodhej një shtetas grek, i cili kishte ndërruar jetë.
Me anë të qenit “Lussy” është ushtruar kontroll në kamion ku mes mallrave janë zbuluar tre kuti kartoni brenda të cilave u gjetën dhe sekuestruan 54 pako me marijuanë të llojit “Skunk” me sasi totale 58 kg 906 gram.
Policia greke ka arritur të kape një shtetas grek, i cili në bashkëpunim me një grek tjetër tashmë në kërkim dhe dy të panjohur, kanë tentuar të çajnë kamionin me qëllim marrjen e drogës.
Është sekuestruar gjithashtu një automjet që është përdorur nga të dyshuarit si dhe një shumë prej 2100 euro.
