Detaje të reja kanë dalë në ditë nga vrasja e Briken Sanaj, në kryeqytet.
Mësohet se hetimet për vrasjen e 39-vjeçarit, në zonën e njohur si “Kodra e Diellit” në kryeqytet, janë përqendruar më së shumti te një konflikt që ka pasur vëllai i tij para disa vitesh me një familje në Lezhë. Gjithësesi policia po kalon në sitë dhe të gjitha dyshimet e tjera, që mund të lidhen me ndonjë konflikt të mundshëm që ka pasur vetë viktima apo aktiviteti me të cilin merrej ai.
Sipas raportimeve, në vendin ku ndodhi krimi, ai ka shkuar së bashku me dhëndrin dhe një shok tjetër, për të ulur gjërat e dasmës. Në momentin kur është qëlluar me armë zjarri, viktima ka qenë në pjesën e bagazhit të makinës, ndërsa dy shokët te dera e garazhit të shtëpisë që ishte e marrë me qira nga dhëndri.
Shoku tjetër që ka qenë i pranishëm, ka deklaruar në dëshminë e tij se ai ka vënë re dy persona të dyshimtë pak para ngjarjes dhe kishte pasur një parandjenjë të keqe, por ata vijuan rrugën e tyre te garazhi i shtëpisë për të lënë gjërat e dasmës.
