45-vjeçari shqiptar që akuzohet për përdhunim në Greqi, po hetohet edhe në Shqipëri për krime të tjera.
Sipas mediave të Athinës, ministri grek i Mbrojtjes së Qytetarëve Takis Theodorikakos ka biseduar me autoritetet shqiptare, pasi dyshohet se 45-vjeçari është arratisur drejt Shqipërisë.
Rezulton se ai nuk është një person i panjohur për autoritetet tona, pasi mund të akuzohet edhe për vepra të tjera penale në Shqipëri, të cilat nuk janë bërë të ditura.
Ministri grek ka kërkuar nga autoritetet shqiptare që të bëjnë gjithçka për të kapur 45-vjeçarin e kërkuar për përdhunim dhe për ta nxjerrë atë para drejtësisë, në rast se ka hyrë në vendin tonë.
Raportohet se policia shqiptare ka nisur hetimet pas kërkesës së palës greke dhe ka kryer kontrolle në disa qytete të Shqipërisë për të gjetur 45-vjeçarin, pas dyshimeve se ai mund të jetë futur në Shqipëri. Kontrolle janë kryer në Vlorë, Fier, Durrës e qytete të tjera.
Njëkohësisht, policia greke po hap edhe dosje të vjetra pasi nuk përjashton mundësinë që 45-vjeçari shqiptar të jetë autor edhe i krimeve të tjera që kanë të bëjnë me sulmet ndaj personave të tjerë. E për këtë arsye, autoritetet greke kanë lëshuar urdhrin për publikimin në media të fotos dhe të dhënave të tjera personale të shqiptarit për ta identifikuar persona të tjerë që mund të kenë rënë pre e sulmeve të tij.
Një analizë ADN-je konfirmoi se 45-vjeçari është autor i përdhunimit të një 34-vjeçareje gjatë javës së kaluar në Athinë. Po atë natë, ai tentoi të përdhunonte edhe një 24-vjeçare tjetër, por kjo e fundit mundi të largohej duke bërtitur e kërkuar ndihmën e kalimtarëve.
Shqiptari u arratis dhe dyshohet se ka kaluar doganën e Kakavijes në orët e para të mëngjesit më 27 Tetor drejt Shqipërisë.
45-vjeçari rezulton se në të kaluarën ai dhunonte edhe nënën e tij. Kjo e fundit, e cila jeton në Athinë, foli dje për mediat greke dhe e mohoi atë si djalë, duke konfirmuar se i biri pinte alkool dhe e dhunonte.
