Gjykata e Apelit të Tiranës nëpërmjet një njoftimi i është përgjigjur interesit të mediave lidhur më çështjen e arrestimit të 32-vjeçarit Fatjon Murataj, i cili u kap teksa lëvizte në zonën e Yzberishtit në një makinë me kreun e bandës së Durrësit Indrit Dokle dhe kunatin e tij Gentian Reçi.
Në komunikatë sqarohet se më 12 korrik, efektivët e repartit “Shqiponja” kanë ndaluar automjetin e markës “Audi”, i cili drejtohej nga Kristian Gjini dhe kanë ushtruar më pas një kontroll në makinë dhe banesë, ku janë sekuestruar sende në cilësinë e provave materiale.
Sipas njoftimit në një çantë dore është gjetur një pistoletë, e cila pasi i është nënshtruar ekspertimit, nga gjurmët papilare ka rezultuar se mbartte shenjat e gishtave të Muratajt.
I riu dyshohej se ishte bashkëpunëtor i Kristian Gjinit, i cili u vu në pranga pas zbulimit të një arsenali armësh në kryeqytet dhe ndaj përfundoi pas hekurave në momentin kur u gjet në makinën e blinduar të Indrit Dokles.
Teksa Gjykata e Tiranës më 11 tetor kishte vendosur masën e sigurisë “arrest në burg” për 32-vjeçarin, Murataj ka paraqitur një kërkesë që çështja të shqyrtohej në Apel.
Ai kërkonte vlerësimin e paligjshëm të ndalimit dhe lirimin e menjëhershëm nga dhomat e paraburgimit, por Apeli ka vendosur sot të lërë në fuqi vendimin e Shkallës së Parë.
NJOFTIMI:
Gjykata e Rrethit Gjyqësor Tiranë, ka zhvilluar gjykimin lidhur me vlerësimin dhe caktimin e masës së sigurimit “arrest ne burg”, ndaj personit nën hetim shtetasit me iniciale F.M. i dyshuar për kryerjen e veprës penale të “Mbajtja pa leje dhe prodhimi i armëve, armëve shpërthyese dhe municionit” kryer në bashkëpunim, parashikuar nga neni 278-25 të K.Penal.
Me vendimin nr. 1575/1 Akti, datë 11.10.2022 Gjykata e Rrethit Gjyqësor Tiranë vendosi:
- Vlerësimin si të ligjshëm të ndalimit të personit nën hetim M., i dyshuar për kryerjen e veprës penale të “Mbajtja pa leje dhe prodhimi i armëve, armëve shpërthyese dhe municionit” kryer në bashkëpunim, parashikuar nga neni 278-25 të K.Penal.
- Caktimin si mase sigurimi “arrestit ne burg”, te parashikuar nga Neni 238 i K. Pr. Penale, për personit nen hetim M i dyshuar për kryerjen e veprës penale të “Mbajtja pa leje dhe prodhimi i armëve, armëve shpërthyese dhe municionit” kryer në bashkëpunim, parashikuar nga neni 278-25 të K.Penal.
Në përfundim të gjykimit Gjykata e Apelit Tiranë, e përbërë nga Gjyqtare znj.Valdete Hoxha, me vendimin nr, 951 datë 31.10.2022 vendosi:
– Miratimin e vendimit nr.1575/1 akti, date 11.10.2022 te Gjykates se Rrethit Gjyqesor Tirane.
