Aplikimi i fashës 800 kWh në muajin nëntor mbetet ende një dilemë, teksa Enti Rregullator i Energjisë në mbledhjen e javës që lamë pas la në fuqi vendimin që rrit çmimin për mbi 71 mijë abonentë familjarë nga 9.5 lekë aktualisht në 45 lekë për kilovat.
Por, nga qeveria duket se nuk e njohin vedimin e ERE-s, pasi kryeministri Edi Rama me një postim bërë dje në Twitter e ka cilësuar të rremë lajmin se energjia do të shtrenjtohet.
“Opozita e Rublave e mediat e saj po u thonë sot shqiptarëve se Qeveria ka deklaruar rritjen e çmimit të energjisë në 1 nëntor! Një lajm dyfish i rremë: Kemi 14 muaj që themi çmimi do mbrohet siç po mbrohet dhe s’e kemi deklaruar kurrë diçka të tillë! Pse e bëjnë? #DavaRublash”, shkruante Rama dje.
Ndërkohë, sot të njëjtin pohim e ka bërë edhe kreu i Grupit Parlamentar të PS, Taulant Balla, i cili deklaroi për mediat se fasha 800 kWh nuk do aplikohet as në nëntor.
Balla hodhi poshtë të gjitha lajmet për rritjen e energjisë, duke thënë se qeveria e ka njoftuar në kohë ERE-n që të mos e aplikojë.
“Shtyrjen edhe për muajin nëntor, edhe pse shi s’ka pasur asnjë pikë, qeveria ka vendosur se për shkak të miradministrimit dhe ndërgjegjes së qytetarëve shqiptarë që kanë dhënë efektet e para të uljes së shpenzimet të energjisë. Jemi ndër vendet e vetme, ku qeveria vazhdon të subvencionojë 80% të faturës. Nuk është e vërtetë. Është një opsion, por qeveria ka njoftuar në kohë Entin Rregullator se nuk do aplikohet”, tha Balla.
