Ministri i Jashtëm rus Sergei Lavrov ka thënë se Kremlini është gati të negociojë me Perëndimin nëse “merren parasysh interesat” e Rusisë, sipas agjencisë së lajmeve të kontrolluara nga shteti RIA Novosti.
Lavrov deklaroi se udhëheqësit perëndimorë do të duhet gjithashtu të ofrojnë “disa qasje serioze që do të kontribuojnë në zbutjen e tensioneve”, të cilat janë shtuar pas edhe përmendjes së përdorimit të armëve bërthamore në konflikt.
Sekretari i shtypit i Kremlinit, Dmitry Peskov bëri komente të ngjashme ditën e sotme, duke thënë se Vladimir Putin dhe Joe Biden mund të “diskutojnë garancitë e sigurisë së Rusisë”, por se bisedime të tilla do të kërkonin gatishmërinë e SHBA për t’u kthyer në “gjendjen dhjetor-janar” të dimrit të kaluar.
Në dhjetor, Kremlini hartoi marrëveshje dhe i dërgoi ato në NATO dhe SHBA, teksa në dokumente kishte kërkuar që NATO të mos zgjerohej më tej, dhe të braktiste çdo aktivitet ushtarak në territorin e Ukrainës, shteteve të tjera të Evropës Lindore dhe Azisë Qendrore, gjë që u refuzua nga NATO dhe SHBA në atë kohë.
Ministri i Jashtëm rus, Sergei Lavrov, tha se Moska është e hapur për bisedime me Perëndimin për luftën në Ukrainë, por shtoi se deri më tani nuk ka pranuar ndonjë propozim serioz për negociata.
Gjatë një interviste për televizionin shtetëror rus, Lavrov tha se zyrtarët, përfshirë edhe zëdhënësin e sigurisë kombëtare të Shtëpisë së Bardhë, John Kirby, kanë thënë se Shtetet e Bashkuara janë të hapura për bisedime, por Rusia ka refuzuar.
“Kjo është gënjeshtër”, tha Lavrov. “Ne nuk kemi pranuar asnjë ofertë serioze për komunikim”.
Ai tha po ashtu se Rusia nuk do të refuzojë ndonjë takim midis presidentit rus, Vladimir Putin, dhe presidentit amerikan, Joe Biden, gjatë takimit të ri të G20-s. Kryediplomati rus tha se nëse ka ndonjë propozim për takimin Putin-Biden, Moska do ta shqyrtojë.
“Ne vazhdimisht kemi thënë se ne nuk refuzojmë asnjëherë takime. Nëse ka ndonjë propozim, ne do ta shqyrtojmë”, tha Lavrov.
